அயர்லாந்தைச் தளமாகக் கொண்டு இயங்கும் ‘ஃபிரண்ட் லைன் டிஃபென்டர்ஸ்’ (Front Line Defenders) அமைப்பின் சார்பில் வழங்கப்படும் “ஆபத்தில் உள்ள மனித உரிமைப் பாதுகாப்பாளர்களுக்கான 2026-ஆம் ஆண்டின் சர்வதேச விருது” (2026 Award for Human Rights Defenders at Risk) இந்திய மனித உரிமை ஆர்வலர் உமர் காலித்திற்கு வழங்கப்பட்டுள்ளது.
டப்ளினில் நடைபெற்ற அதிகாரப்பூர்வ விருது வழங்கும் விழாவில் இந்த விருது அறிவிக்கப்பட்டது. இருப்பினும், தொடர்ச்சியாகச் சிறையில் அடைக்கப்பட்டுள்ளதால் உமர் காலித்தால் இந்த விழாவில் நேரில் கலந்து கொள்ள முடியவில்லை.
2020-ஆம் ஆண்டு வடகிழக்கு டெல்லி கலவர சதி வழக்கில் செப்டம்பர் 13, 2020 அன்று கைது செய்யப்பட்ட உமர் காலித், எவ்வித விசாரணையும் இன்றி ஆறு ஆண்டுகளுக்கும் மேலாகச் சிறையில் அடைக்கப்பட்டுள்ளார்.
மனித உரிமைப் பாதுகாப்பாளர்கள், பத்திரிகையாளர்கள் மற்றும் மாணவர்களுக்கு எதிராகப் பயங்கரவாத எதிர்ப்புச் சட்டங்கள் (UAPA) மற்றும் கடுமையான ஜாமீன் நிபந்தனைகள் தவறாகப் பயன்படுத்தப்படுவதையே அவரது தொடர் சிறைவாசம் காட்டுகிறது என ‘ஃபிரண்ட் லைன் டிஃபென்டர்ஸ்’ அமைப்பு கவலை தெரிவித்துள்ளது. மேலும், 2020-ஆம் ஆண்டு அமராவதியில் அவர் ஆற்றிய உரை வன்முறையைத் தூண்டும் வகையில் அமையவில்லை என்றும் அந்த அமைப்பு சுட்டிக்காட்டியுள்ளது.
சர்ஜீல் இமாம் (Sharjeel Imam) உள்ளிட்ட பிற குற்றம் சாட்டப்பட்டவர்களுடன் சேர்ந்து உமர் காலித் மீதும் சட்டவிரோத நடவடிக்கைகள் தடுப்புச் சட்டம் (UAPA) மற்றும் பிற பிரிவுகளின் கீழ் வழக்குப்பதிவு செய்யப்பட்டுள்ளது. இவர்களது ஜாமீன் மனுக்களை நீதிமன்றங்கள் தொடர்ந்து நிராகரித்து வருகின்றன. சமீபத்தில் செப்டம்பர் 30 அன்று உமர் காலித் மற்றும் சர்ஜீல் இமாமின் ஜாமீன் மனுக்களை டெல்லி உயர் நீதிமன்றம் மீண்டும் நிராகரித்தது.
