புதிதாக அமல்படுத்தப்பட்டுள்ள ஆசனப்பட்டை (Seat Belt) சட்டத்தின் கீழ், ஐந்து பேரடங்கிய ஒரு குடும்பம் வாகனத்தில் பயணிக்கும் போது குழந்தைகளுக்காகப் பின் இருக்கையின் நடுவில் கூடுதல் ஆசனப்பட்டை ஒன்றை வழமையாகப் பொருத்திக் கொள்ள முடியும் என போக்குவரத்து அமைச்சர் பிமல் ரத்நாயக்க இன்று (22) பாராளுமன்றத்தில் தெரிவித்தார்.
பாராளுமன்றத்தில் உரையாற்றிய அமைச்சர், இந்தச் சட்டத்தின் நோக்கம் வாகனத்தில் பயணிக்கும் நபர்களின் எண்ணிக்கையைக் கட்டுப்படுத்துவது அல்ல என்றும், மாறாக அனைவரின் பாதுகாப்பை உறுதி செய்வதே என்றும் விளக்கமளித்தார்.
“வாகனத்தில் ஒவ்வொரு இருக்கைக்கும் ஒரு ஆசனப்பட்டை இருக்க வேண்டும் என்பதே எங்கள் கோரிக்கை. வாகனத்தில் மூன்று அல்லது நான்கு பேர் மட்டுமே பயணிக்க வேண்டும் என உத்தரவிட எங்களுக்கு அதிகாரமில்லை. ஒவ்வொரு பயணிக்கும் ஆசனப்பட்டை இருக்கிறதா என்பதே முக்கியம்” என அமைச்சர் தெரிவித்தார்.
ஒரு குடும்பத்தில் பெற்றோர் மற்றும் மூன்று குழந்தைகள் இருந்தால், பின் இருக்கையின் நடுவில் ஒரு குழந்தைக்குக் கூடுதலாக ஒரு ஆசனப்பட்டையைப் பொருத்திக் கொள்ள முடியும்.
ஏற்கனவே ஆசனப்பட்டைகள் உள்ள வாகனங்களில் பயணிகள் கட்டாயம் ஆசனப்பட்டை அணிய வேண்டும். ஆசனப்பட்டை இல்லாத பழைய வாகனங்களுக்கு அவற்றைப் பொருத்துவதற்காக ஓராண்டு கால அவகாசம் வழங்கப்பட்டிருந்த நிலையில், செப்டம்பர் 19 முதல் இச்சட்டம் கட்டாயமாக்கப்பட்டுள்ளது.
பள்ளி மாணவர்கள் பயணித்த 11 வாகனங்கள் சம்பந்தப்பட்ட அதிவேக நெடுஞ்சாலை விபத்தை மேற்கோள் காட்டிய அமைச்சர், பஸ்ஸிலிருந்த பயணிகள் அனைவரும் ஆசனப்பட்டை அணிந்திருந்ததால் பெரிய ஆபத்து தவிர்க்கப்பட்டு, சிறிய காயங்களுடன் தப்பியதாகச் சுட்டிக்காட்டினார்.
இந்த விதிமுறைகள் பயணிகள் எண்ணிக்கையைக் கட்டுப்படுத்துவதற்காக அல்லாமல், வீதிப் பாதுகாப்பை மேம்படுத்துவதற்காகவே கொண்டுவரப்பட்டுள்ளதாக அவர் மேலும் வலியுறுத்தினார்.
