இலங்கையரான சிவராசா அனோஜனுக்கு சவுதி அரேபியாவில் விதிக்கப்பட்டுள்ள மரண தண்டனையை உடனடியாக ரத்து செய்யுமாறு சர்வதேச மன்னிப்புச் சபை வலியுறுத்தியுள்ளது. இது தொடர்பில் சர்வதேச மன்னிப்புச் சபை அறிக்கையொன்றை வெளியிட்டுள்ளது.
அனோஜனுக்கு எதிரான குற்றச்சாட்டானது முற்றாக கருத்து வெளியிடும் உரிமையுடன் தொர்புடையதாக இருப்பதால் அவர் உடனடியாக நிபந்தனைகளின்றி விடுவிக்கப்பட வேண்டுமென அறிக்கையில் சுட்டிக்காட்டப்பட்டுள்ளது.
மொஹமது நபி அவர்களை இழிவுபடுத்தும் வகையில் வெளியிடப்பட்டதாக கூறப்படும் கருத்தினை சமூக ஊடகத்தில் வெளியிட்ட குற்றச்சாட்டில் சவுதி அரேபியாவில் கைதான சிவராசா அனோஜனுக்கு அந்நாட்டு மேன்முறையீட்டு நீதிமன்றத்தினால் மரண தண்டனை தீர்ப்பளிக்கப்பட்டது.
வெறுமனே தமது கருத்தினை வெளிப்படுத்திய காரணத்திற்காக எந்தவொரு நபரையும் சிறைத்தண்டனைக்கு உட்படுத்த கூடாதெனவும், மரணதண்டனை போன்ற பாரிய தண்டனைக்கு உட்படுத்துவதை ஏற்றுக்கொள்ள முடியாதெனவும் சர்வதேச மன்னிப்புச் சபை வலியுறுத்தியுள்ளது.
இதேவேளை அனோஜன் தொடர்பில் ஆராய்வதற்கான சவுதி அரேபியாவின் இலங்கைக்கான தூதுவர் இன்றைய தினம் அந்நாட்டின் தமாம் சிறைச்சாலைக்கு செல்லவுள்ளமை குறிப்பிடத்தக்கது.
