முஸ்லிம் விவாக விவாகரத்து சட்டத்தில் மேற்கொள்ளப்பட வேண்டிய திருத்தங்கள் தொடர்பில் அகில இலங்கை ஜம்இய்யத்துல் உலமா சபை தயாரித்து நீதியமைச்சர் விஜயதாச ராஜபக்ஷவுக்கு கையளிக்கவுள்ள அறிக்கைக்கு அனுமதியளிக்க ஸ்ரீ லங்கா முஸ்லிம் கவுன்ஸில் மறுத்துள்ளது.
ஸ்ரீலங்கா முஸ்லிம் கவுன்ஸில் உலமா சபையின் அறிக்கையை முற்றிலும் நிராகரிப்பதாகவும் குறிப்பிட்ட அறிக்கை ஏற்கனவே ஜனாதிபதி சட்டத்தரணி பாயிஸ் முஸ்தபாவின் தலைமையில் அகில இலங்கை ஜம் இய்யத்துல் உலமாசபை உட்பட முஸ்லிம் சிவில் சமூக அமைப்புகள் ஒன்றுகூடி மேற்கொண்ட தீர்மானத்துக்கு முரண்பட்டதாக அமைந்துள்ளதாகவும் உலமா சபையின் தலைவர் அஷ்ஷெய்க் ரிஸ்வி முப்திக்கு அனுப்பி வைத்துள்ள கடிதத்தில் குறிப்பிட்டுள்ளது.
இந்த அறிக்கை ஏற்கனவே ஜனாதிபதிக்கும் நீதியமைச்சருக்கும் அனுப்பி வைக்கப்பட்டுள்ளதாகவும் சுட்டிக்காட்டியுள்ளது.
ஸ்ரீலங்கா முஸ்லிம் கவுன்ஸிலின் தலைவர் என்.எம்.அமீன் மற்றும் செயலாளர் எ.டி.எம். ரிஸ்வி கையொப்பமிட்டு அனுப்பி வைத்துள்ள கடிதத்தில் மேலும் தெரிவிக்கப்பட்டுள்ளதாவது,
“ நீதியமைச்சருக்கு கையளிப்பதற்காக தயாரிக்கப்பட்டுள்ள சிபாரிசுகள் அடங்கிய அறிக்கையின் பிரதியொன்றினை அனுப்பி வைத்துள்ளீர்கள்.
அதில் கடந்த 11 ஆம் திகதி உலமா சபை அலுவலகத்தில் நடைபெற்ற சிவில் சமூக பிரதிநிதிகளுடனான கூட்டத்தில் எடுக்கப்பட்ட தீர்மானம் எனவும் குறிப்பிட்டுள்ளீர்கள்.
கூட்டத்தில் கலந்து கொண்டவர்கள் வருகை ஆவணத்தில் கையொப்பமிட்டமை தீர்மானங்களுக்கு இணங்கியமையாக கருத முடியாது. எனவே ஸ்ரீலங்கா முஸ்லிம் கவுன்ஸில் தங்களது சிபாரிசுகளுக்கு கையொப்பமிட்டதாக உள்வாங்காதீர்கள்.
தங்களது முரண்பட்ட நிலைப்பாடு குறித்து அறிந்து கொள்ள விரும்புகிறோம் எனவும் தெரிவிக்கப்பட்டுள்ளது.
நன்றி: விடிவெள்ளி
