-ஜாபிர் நளீமி
இலங்கையின் இஸ்லாமிய கலை மற்றும் அறிவுசார் துறையில் உஸ்தாத் முகம்மது உவைஸ் அஸ்-சைலானி தொடர்ந்து ஒரு முக்கிய நபராக திகழ்ந்து வருகின்றார்.
உஸ்தாத் உவைஸ் இலங்கையின் முதல் மற்றும் ஒரே சான்றளிக்கப்பட்ட அரபு எழுத்தணி கலைஞர் என்று நன்கு அறியப்பட்டவர்.
கூஃபிக் கையெழுத்துக் கலையில் அவரது தன்னிகரற்ற திறமையும் அரபு கையெழுத்துக் கலையை பேணிப் பாதுகாப்பதில் அவரது ஆர்ப்பாட்டமற்ற அர்ப்பணிப்பும் மிகவும் பாராட்டத்தக்கதாகும்.
அவரது பங்களிப்பானது இளைய தலைமுறையினர் மத்தியில் இக்கலை மீது மிகுந்த ஆர்வத்தைத் தூண்டியுள்ளது.
முஸ்லிம் இளைஞர் சங்கத்தில் சந்திப்பு
நீண்ட நாட்களுக்குப் பிறகு, கொழும்பு தெமட்கொடை வீதியில் உள்ள YMMA எனப்படும் முஸ்லிம் இளைஞர் சங்கக் கட்டிடத்தில் அன்மையில் நடைபெற்ற உஸ்தாத் அவர்களுடைய அரபு கையெழுத்து கண்காட்சியில் உஸ்தாத் உவைஸைச் சந்தித்தமை எனக்கு மிகுந்த மகிழ்ச்சியை தந்தது.
இக்கண்காட்சியில் உஸ்தாத் அவர்களின் பதினாறு அற்புதமான படைப்புகள் பொதுமக்கள் பார்வைக்காக வைக்கப்பட்டிருந்தன.
அது உண்மையிலேயே அவரது கலைத் திறமையை உலகிற்கு வெளிப்படுத்திய ஒரு அற்புதமான சந்தர்ப்பமாகும்.
பல ஆண்டுகளாக, அரபு கையெழுத்துக் கலைக்கு உஸ்தாத் அவர்களின் பங்களிப்பைக் குறிக்கும் வகையில் ஒரு கண்காட்சி ஒன்றை நடாத்துமாறு நான் அவரிடம் பலமுறை கேட்டுள்ளேன்.
உஸ்தாத் அவர்கள் அந்த வேண்டுகோலை பணிவுடன் மறுத்து வந்தார். அந்த நிலையில் அவரது 16 தலைசிறந்த படைப்புகளை காட்சிப்படுத்தியது மற்றுமின்றி அவரும் அங்கு இருந்தமை எனக்கு மிகுந்த மகிழ்ச்சியை தந்தது. காட்சிக்கு வைத்திருந்த படைப்புகள் ஒவ்வொன்றும் உஸ்தாத் அவர்களுடைய சிறப்பியல்பு துல்லியம், கட்டுப்பாடு மற்றும் ஆன்மீக ஆழத்தை பிரதிபலித்தன.
போற்றவல்ல பங்களிப்பு
கொழும்பு கொம்பெனித்தெருவில் 1957 அக்டோபர் 23 அன்று பிறந்த முகமது உவைஸ், அங்கேயே உள்ள சாஹிரா கல்லூரியில் (தற்போது டி.பி. ஜாயா மகா வித்யாலயம்) தனது முறைசார் கல்வியைத் தொடங்கினார்.
பின்னர், அக்டோபர் 1973 இல் இளம் உவைஸ் பேருவளையில் உள்ள ஜாமியா நளீமியா பல்கலைக்கழகத்தின் முதல் மாணவர் சேர்க்கை குழுவில் உள்வாங்கப்பட்டார்.
அவர் ஆங்கிலத்தில் ஆரம்பக் கல்வியைப் பெற்றாலும், பின்னர் ஜாமியாவில் தமிழ் மற்றும் அரபு மொழிகளிலும் புலமைப் பெற்றார்.
1975 – 1978 காலகட்டத்தில் வாலிபர் உவைஸ் தமிழில் கவிதைகளையும் எழுதி புகழ் பெற்றார்.
அதன் பின்னர், 1978 ஆம் ஆண்டு, எகிப்தின் கெய்ரோவில் உள்ள உலகப் புகழ்பெற்ற மற்றும் பத்து நூற்றாண்டு பழமையான அல்-அஸ்ஹர் பல்கலைக்கழகத்தில் உயர் கல்வியைத் தொடர முஹம்மது உவைஸிட்கு வாய்ப்பு வழங்கப்பட்டது.
1983 ஆம் ஆண்டு அப்பல்கலைக்கழகத்தில் அரபு மொழி மற்றும் தர்க்கக் கலையில் கலாநிதிப் பட்டத்தை உஸ்தாத் உவைஸ் பெற்றார்.
அதன் பின் இலங்கைக்குத் திரும்புவதற்குப் பதிலாக, கெய்ரோவிலேயே உள்ள அல்-கலீல் அகா காலிகிராஃபி கல்லூரியில் இணைந்து மேலும் நான்கு ஆண்டுகள் (1983-1987) அக்கலையையும் பயின்றார். அரபு கையெழுத்தில் அதிகாரப்பூர்வமாக சான்றிதழ் பெற்ற முதல் மற்றும் ஒரே இலங்கையர் உஸ்தாத் உவைஸ் அவர்களே.
பின்னர் உஸ்தாத் உவைஸ் சவூதி அரேபியாவுக்குச் சென்று 2022 வரை மொழிபெயர்ப்பாளராகவும் செயலாளராகவும் அங்கு பணியாற்றினார்.
அவரது வாழ்நாள் முழுவதும், அவர் அரபு கையெழுத்து மற்றும் புகைப்படக் கலையில் ஆழ்ந்த ஈடுபாடு கொண்டிருந்த போதிலும் அவை மூலம் பொருளாதார இலாபம் ஈட்ட அவர் ஒரு போதும் முனையவில்லை.
அவரது திறமைகள் ஆழ்ந்த தனிப்பட்ட மற்றும் ஆன்மீக வெளிப்பாடுகளாக மட்டுமே இருந்தன.
இஸ்லாமிய பெயர் சூடும் மரபை ஆராய்வதிலும் அவர் ஆர்வம் கொண்டிருந்தார். மேலும் ஜப்பானிய கலையான ஓரிகாமியும் உஸ்தாத்தின் ஒரு பொழுதுபோக்காக உள்ளது.
சமூகப் பங்களிப்பு
1990 களில் இருந்து, உஸ்தாத் அவர்கள் தனது மனைவி மற்றும் இரு பிள்ளைகளுடன் கொழும்பு கொல்லுப்பிட்டியல் அமைதியான வாழ்க்கையைத் தேடி குடியமர்ந்தார், ஆனால் அரபுக் கையெழுத்துக் கலையில் ஆர்வமுள்ள பலர் அவரை அணுகி அந்தக் கலையை தமக்குக் கற்பிக்குமாறு கேட்டுக்கொண்டனர்.
அவ்வாறு அவரிடம் அக்கலையை கற்ற மாணவர்களில் முகமது ஷகிப், முகமது ரஃபீஸ், ஜுனைத் நசீர், உஸ்தாத் மஜீம் மற்றும் உஸ்தாத் சில்மி ஆகியோர் அடங்குவர்.
2017 ஆம் ஆண்டில், இலங்கை அரபு கையெழுத்துக்கலை சங்கத்தை உஸ்தாத் உவைஸ் நிறுவினார்.
அதன் பின்னர் அவர் அதில் தீவிரமாக ஈடுபட்டு, சங்கத்தின் தொலைநோக்குப் பார்வையை வழிநடத்தி, தனது பல தசாப்த அறிவு மற்றும் தொழில்நுட்பத்துடன் அதன் உறுப்பினர்களுக்கு பங்களிப்பு செய்து வருகின்றமை குறிப்பிடத்தக்கது.
கலை மற்றும் கலாச்சார பங்களிப்புகள்
உஸ்தாத் உவைஸின் ஆரம்பகால மற்றும் மிகவும் பிரபலமான படைப்புகளில் ஒன்று ஜாமியா நளீமியா பல்கலைக்கழகத்தின் உத்தியோகபூர்வ இதழான இஸ்லாமிய சிந்தனை இதழின் இரண்டாவது பிரசுரத்தின் முன் அட்டையை அலங்கரித்த கையெழுத்து வடிவமாகும்.
இது கடந்த 50 ஆண்டுகளாக அந்த இதழ்களின் அட்டைகளை அலங்கரித்து வந்த வண்ணம் மாணவர் கையெழுத்துப் பாரம்பரியத்தைத் தொடர துணை புரிந்து வருகின்றது.
அது முதல் உஸ்தாத் உவைஸ் ஏராளமான பத்திரிகைகள் மற்றும் புத்தகங்களின் அட்டைகளுக்கு தனது திறமை மூலம் பங்களிப்பு செய்து வருகின்றார்.
கொழும்பு முஸ்லிம் இளைஞர் சங்கத்தில் நடைபெற்ற உஸ்தாத் அவர்களின் படைப்புக்களின் கண்காட்சி, உலகிற்கு அவரது அமைதியான ஆனால் சக்திவாய்ந்த மரபை நினைவூட்டுவதாகவே அமைந்தது எனலாம்.
காட்சிப்படுத்தப்பட்ட அவருடைய பதினாறு படைப்புகள் அவரது தனித்துவமான பாணி, கூஃபிக் வடிவியல் மற்றும் ஆன்மீக அர்த்தத்தின் அழகை சிறப்பாக வெளிப்படுத்தின.
உஸ்தாத் உவைஸை தனிப்பட்ட முறையில் அறிந்தவர்கள் பெரும்பாலும் அவரை ஒழுக்கம் மற்றும் ஆழமான கொள்கைகளைக் கொண்ட ஒரு உன்னத மனிதர் என்றே வர்ணிக்கின்றனர்.
அவர் கலை மற்றும் நெறிமுறைகளின் உயர் தரங்களைப் பாதுகாப்பவராக அறியப்பட்டாலும், இவை எதுவும் அவரது எளிமை மற்றும் பணிவை அவரிடமிருந்து பறிக்கவில்லை.
