கொழும்பு மேல் நீதிமன்றத்தில் பாதாள உலகத் தலைவர் கணேமுல்ல சஞ்சீவ சுட்டுக் கொல்லப்பட்ட வழக்கில் தேடப்படும் இஷாரா செவ்வந்தி, குற்றம் நடந்த அதே நேரத்தில் துபாய்க்கு தப்பிச் சென்றிருப்பது தெரியவந்துள்ளது.
இந்தோனேசியாவின் ஜகார்த்தாவில் சமீபத்தில் கைது செய்யப்பட்டு விசாரிக்கப்பட்ட பாதாள உலகத் தலைவரான கெஹல்பத்தர பத்மே வெளியிட்ட ஒரு அறிக்கையில் இந்த உண்மை தெரியவந்துள்ளது.
சட்டத்தரணி வேடமணிந்த இஷாரா செவ்வந்தி, சட்டப் புத்தகத்தில் மறைத்து வைக்கப்பட்டிருந்த துப்பாக்கியை நீதிமன்ற அறைக்குள் கொண்டு வந்து துப்பாக்கிச் சூடு நடத்தியவரிடம் கொடுத்ததாகக் கூறப்படுகிறது.
கொலைக்குப் பிறகு, பல காவல்துறை குழுக்கள் அவரைத் தேடி நாடு முழுவதும், காட்டுப் பகுதிகளிலும் சோதனை நடத்தினர். ஆனால் அவரை கைது செய்ய முடியவில்லை.
இதன்படி பத்மேவின் வெளிப்பாட்டின் அடிப்படையில் இஷாரா வெளிநாடு சென்றதாக தகவல் கிடைத்தாலும், அவர் இன்னும் நாட்டில் ஒளிந்து கொண்டிருக்கிறாரா என்ற கோணத்தில் காவல்துறையினர் விசாரித்து வருவதாக தெரிவிக்கப்படுகின்றது.
அப்போது நடத்தப்பட்ட விசாரணைகளில், துப்பாக்கிச் சூடு நடத்திய நபருடன் மதுகம பகுதியில் உள்ள ஒரு தங்க நகைக் கடையில் இருந்து அவள் நகைகளை வாங்கியதாகவும் தெரிவிக்கப்பட்டது.
இஷாரா செவ்வந்தி துபாய்க்கு தப்பிச் சென்றபோது கெஹல்பத்தர பத்மேவும் அவரது குழுவினரும் வேறொரு நாட்டில் வசித்து வந்ததாகவும் விசாரணையில் தெரியவந்துள்ளது.
இந்தக் குழு அவ்வப்போது துபாய், தாய்லாந்து, லாவோஸ் மற்றும் சுவிட்சர்லாந்து போன்ற பல நாடுகளில் வசித்து வந்ததாக காவவல்துறை வட்டாரங்கள் தெரிவிக்கின்றன.
இஷாரா செவ்வந்தி துபாயில் தலைமறைவாக இருப்பதாக கிடைத்த தகவலை மேலும் உறுதிப்படுத்திய பின்னர், அவரை கைது செய்வதற்கான கூடுதல் நடவடிக்கைகளை எடுப்பதாக பொலிஸார் தெரிவிக்கின்றனர்.
கணேமுல்ல சஞ்சீவ கொலைக்கு உதவியதாக அவரது தாயாரும் சகோதரரும் முன்னர் கொழும்பு குற்றப்பிரிவால் கைது செய்யப்பட்டு விளக்கமறியலில் வைக்கப்பட்டனர்.
புற்றுநோயால் பாதிக்கப்பட்ட அவரது தாயார், விளக்கமறியலில் வைக்கப்பட்டிருந்தபோது அவரது உடல்நிலை மோசமடைந்ததால், சிறை அதிகாரிகளின் பாதுகாப்பில் மருத்துவமனையில் சிகிச்சை பெற்று வந்த நிலையில் இறந்தார்.
