வடகொரியாவின் ஆளும் கட்சியான தொழிலாளர் கட்சியின் 9-வது மாநாட்டில், அந்நாட்டின் தலைவர் கிம் ஜாங் உன் ஒருமனதாக மீண்டும் கட்சியின் பொதுச் செயலாளராக தேர்ந்தெடுக்கப்பட்டுள்ளார்.
பியோங்யாங்கில் கடந்த சில நாட்களாக நடைபெற்று வரும் இந்த முக்கியமான கட்சி மாநாட்டில், கிம் ஜாங் உன்னுக்கு கட்சியின் மிக உயரிய பதவியை வழங்க அனைத்து பிரதிநிதிகளும் முழு ஆதரவு தெரிவித்தனர்.
கடந்த ஐந்து ஆண்டுகளில் நாட்டின் இராணுவ வலிமையை மேம்படுத்தியது, குறிப்பாக அணுசக்தி மற்றும் ஏவுகணைத் திட்டங்களில் அடைந்த முன்னேற்றங்களுக்காக அவருக்கு இந்த அங்கீகாரம் வழங்கப்பட்டுள்ளதாகத் தெரிவிக்கப்பட்டுள்ளது.
2021-ம் ஆண்டு நடைபெற்ற 8-வது கட்சி மாநாட்டின் போது கிம் ஜாங் உன் முதன்முதலில் பொதுச் செயலாளராகப் பொறுப்பேற்றார். தற்போது இரண்டாவது முறையாக அதே பதவிக்கு அவர் நீடிக்கப்பட்டுள்ளார்.
கிம் ஜாங் உன்னின் இந்தத் தேர்வு, வடகொரியாவில் அவரது அதிகாரம் மேலும் வலுவடைந்துள்ளதைக் காட்டுகிறது. இந்தப் பதவியேற்பைத் தொடர்ந்து சீனா உள்ளிட்ட நட்பு நாடுகளின் தலைவர்கள் அவருக்கு வாழ்த்துகளைத் தெரிவித்து வருகின்றனர்.
