பாதுகாப்பு அமைச்சினால் வர்த்தமானிப்படுத்தப்பட்ட புதிய பயங்கரவாதப் பட்டியலில் கவிஞர் அஹ்னாப் ஜஸீம், இலங்கை ஜமாஅத்தே இஸ்லாமியின் முன்னாள் தலைவர் உஸ்தாத் ரஷீத் ஹஜ்ஜூல் அக்பர் உள்ளிட்ட பலர் உள்வாங்கப்பட்டுள்ளனர்.
ஈஸ்டர் தாக்குதலின் பின்னர் பயங்கரவாதப் பட்டியலில் இணைக்கப்பட்டிருந்த தேசிய தௌஹீத் ஜமாஅத் (NTJ), ஜமாஅதே மில்லது இப்ராஹீம் (JMI), விலாயத்துஸ் ஸைலானி என்பவற்றுடன் தாருல் அதர் பள்ளிவாசல், குர்ஆன் மத்ரஸா, மற்றும் சேவ் த பேர்ள்ஸ் தொண்டு நிறுவனம், ஸ்ரீலங்கா இஸ்லாமிய மாணவர் இயக்கம் என்பனவும் பயங்கரவாதப் பட்டியலில் புதிதாக இணைக்கப்பட்டுள்ளன.
பயங்கரவாதத்துடன் தொடர்புப்பட்ட செயற்பாடுகளில் ஈடுபட்டதாகக் கூறப்படும் 15 நிறுவனங்களுடன் இந்த நிறுவனங்களும் இணைக்கப்பட்டுள்ளன.
புதிதாகப் பட்டியலிடப்பட்டுள்ள சேர்வ் த பேர்ள்ஸ் தொண்டு நிறுவனத்தில் விரிவுரை நிகழ்த்திய கவிஞர் அஹ்னாப் ஜஸீம் புதிய பயங்கரவாதப் பட்டியலில் உள்வாங்கப்பட்டுள்ளார்.
கவிஞர் அஹ்னாப் ஜஸீம் எழுதிய ‘நவரசம்’ கவிதைப் புத்தகத்தில் பயங்கரவாதத்தைத் தூண்டும் விதமான கவிதைகள் அடங்கியிருந்ததாக அவர் கைது செய்யப்பட்டிருந்தார்.
உண்மையில் அவரது கவதைகள் தீவிரவாதத்துக்கு எதிரானவையாகவே அமைந்திருந்தன என அவரது தரப்பிலிருந்து எடுத்துக் காட்டப்பட்டிருந்தது.
அவரது தடுத்து வைப்பு கருத்துச் சுதந்திரத்துக்கு எதிரானது என நாட்டில் பல்வேறு தரப்பிலிருந்தும் குரல்கள் எழுப்பப்பட்டன.
ஐக்கிய நாடுகள் சபையின் தன்னிச்சையான கைதுகளுக்கான செயலணி அஹ்னாப் ஜஸீம் தொடர்பில் இலங்கை அரசாங்கம் நடந்து கொண்ட விதம் தவறானது எனக் குறிப்பிட்டிருந்தது.
இந்த நிலையிலேயே அதே ஐக்கிய நாடுகள் சபைகளின் ஒழுங்கு விதிகளின் கீழ் இலங்கை அரசாங்கம் இவரை பயங்கரவாதிகள் பட்டியலில் இணைத்துள்ளது.
அதேபோல இலங்கை ஜமாஅத்தே இஸ்லாமியின் முன்னாள் அமீர் உஸ்தாத் ரஷீத் ஹஜ்ஜூல் அக்பர் மீதான விசாரணைகள் இன்னும் முற்றுப் பெறாத நிலையில் அவர் மீது குற்றப்பத்திரிகை எதுவும் முன்வைக்கப்படாமலேயே அவர் பயங்கரவாதிகள் பட்டியலில் இணைக்கப்பட்டுள்ளார்.
இதேபோல அவுஸ்திரேலியாவில் வசிக்கும் அஹமத் லுக்மான் தாலிபும் பட்டியலில் இணைக்கப்பட்டுள்ளார்.
இவரது சட்டத்தரணி இதற்கு முன்னர் அவர் மீதான குற்றச்சாட்டுக்களை மறுத்து அறிக்கை வெளியிட்டிருந்தார்.
பயங்கரவாதத்துடன் தொடர்புடைய செயற்பாடுகள் காரணமாகவே இவர்கள் பட்டியலில் இணைக்கப்பட்டுள்ளனர்.
பட்டியலிடப்பட்டுள்ள 316 பேரில் 157 பேர் மாவனல்லை புத்தர் சிலை உடைப்பு, ஈஸ்டர் தாக்குதல் சம்பவங்களுடன் தொடர்புபடுத்தி பட்டியலிடப்பட்டவர்களாவர்.
பயங்கரவாதத்துடன் தொடர்புடைய செயற்பாடுகள் மற்றும் பயங்கரவாதத்துக்கு நிதியளித்தல் போன்ற காரணங்களுக்காக இவர்களின் பெயர்கள் பட்டியலிடப்பட்டுள்ளன.
பாதுகாப்பு அமைச்சின் செயலாளர் ஓய்வு பெற்ற ஜெனரல் கமல் குணரத்னவினால் ஓகஸ்ட் 01 ஆம் திகதி இந்த விஷேட வர்த்தமானி வெளியிடப்பட்டுள்ளது.
அது தொடர்பான வர்த்தமானி வெளியீடு:
