இஸ்ரேலிய இராணுவத்திற்கு செயற்கை நுண்ணறிவு (AI) தொழில்நுட்பத்தை மைக்ரோசாப்ட் நிறுவனம் வழங்கி வருவதற்கு அந்நிறுவனத்தின் ஊழியர்கள் கடும் எதிர்ப்பு தெரிவித்துள்ளனர்.
அமெரிக்காவில் மைக்ரோசாப்ட் நிறுவனத்தின் 50 ஆவது ஆண்டுவிழா கொண்டாடப்பட்டது. அப்போது பலஸ்தீனிய ஆதரவு கொண்ட ஊழியர்கள் கூச்சலிட்டு போராட்டம் நடத்தினர்.
மைக்ரோசாப்ட் AI இன் தலைமை நிர்வாக அதிகாரி முஸ்தபா சுலேமான் பேசிக்கொண்டிருக்கும் போது அபூசாத் என்ற ஊழியர் “முஸ்தபா, உங்களுக்கு வெட்கமாக இல்லையா” என்று கூச்சலிட்டார்.
“நீங்கள் AI ஐ நன்மைக்காகப் பயன்படுத்துவதில் அக்கறை கொண்டுள்ளதாகக் கூறுகிறீர்கள், ஆனால் மைக்ரோசாப்ட் இஸ்ரேலிய இராணுவத்திற்கு AI ஆயுதங்களை விற்கிறது,” “ஐம்பதாயிரம் பேர் இறந்துள்ளனர், மேலும் மைக்ரோசாப்ட் எங்கள் பிராந்தியத்தில் இந்த இனப்படுகொலைக்கு அதிகாரம் அளிக்கிறது.”
“காசாவில் ஐம்பதாயிரம் பலஸ்தீனியர்கள் மைக்ரோசாஃப்ட் தொழில்நுட்பத்தால் கொல்லப்பட்டுள்ளனர், உங்களுக்கு எவ்வளவு தைரியம். அவர்களின் இரத்தத்தில் கொண்டாடியதற்காக உங்கள் அனைவருக்கும் வெட்கமாக இல்லையா, இஸ்ரேலுடனான உறவுகளை துண்டிக்கவும்.”
” நீங்கள் ஒரு போர் லாபம் தேடுபவர். இனப்படுகொலைக்கு AI ஐப் பயன்படுத்துவதை நிறுத்துங்கள், முஸ்தபா “எங்கள் பிராந்தியத்தில் இனப்படுகொலைக்கு AI ஐப் பயன்படுத்துவதை நிறுத்துங்கள். உங்கள் கைகளில் இரத்தம் இருக்கிறது. மைக்ரோசாப்ட் நிறுவனத்தின் அனைத்து கைகளிலும் இரத்தம் இருக்கிறது என்று அபூசாத் கூறினார்.
அப்போது மற்றொரு ஊழியர் மைக்ரோசாப்ட் இணை நிறுவனர் பில் கேட்ஸ் மற்றும் தலைமை நிர்வாக அதிகாரி சத்யா நாதெல்லா அவர்களே, “உங்களுக்கு வெட்கமாக இல்லையா.. நீங்கள் அனைவரும் நயவஞ்சகர்கள்” என்று கூச்சலிட்டார்.
காசா மற்றும் லெபனான் மீது இஸ்ரேல் குண்டுவீசி தாக்குதல் நடத்தியபோது இலக்குகளை குறிவைத்து தாக்க மைக்ரோசாப்ட் மற்றும் ஓபன் ஏஐ openAI ஆகியவற்றின் செயற்கை நுண்ணறிவு (AI) தொழில்நுட்பத்தை இஸ்ரேல் பயன்படுத்தியது குறிப்பிடத்தக்கது.
காசா மீதான இஸ்ரேலின் போரில் குறைந்தது 50,609 பலஸ்தீனியர்கள் இறந்ததாக உறுதிப்படுத்தப்பட்டுள்ளது. 115,063 பேர் காயமடைந்துள்ளனர் என்று காசாவின் சுகாதார அமைச்சகம் தெரிவித்துள்ளது.
