கத்தாரில் இஸ்ரேல் நடத்திய கொடூரமான வான் வழித் தாக்குதல்களைத் தொடர்ந்து அரபுலக தலைவர்கள் தோஹாவில் கூட இருக்கின்றார்கள்.
ஹமாஸ் தலைவர்களை குறிவைத்து இஸ்ரேல் நடத்திய சமீபத்திய தாக்குதலுக்கு பதிலளிக்கும் விதமாக, செப்டம்பர் 15 ஆம் திகதி அவசர அரபு-இஸ்லாமிய உச்சிமாநாட்டை நடத்தப்போவதாக கத்தார் சனிக்கிழமை உறுதிப்படுத்தியது.
பிரதமரின் ஆலோசகரும் வெளியுறவு அமைச்சகத்தின் செய்தித் தொடர்பாளருமான மஜீத் பின் முகமது அல்-அன்சாரி, கருத்து தெரிவிக்கையில்,
“நாளை ஞாயிற்றுக்கிழமை நடைபெறும் அரபு மற்றும் இஸ்லாமிய வெளியுறவு அமைச்சர்களின் கூட்டத்தால் சமர்ப்பிக்கப்பட்ட கத்தார் நாட்டின் மீதான இஸ்ரேலிய தாக்குதல் குறித்த வரைவுத் தீர்மானம் குறித்து உச்சிமாநாடு விவாதிக்கும்” என்று கூறினார்.
தோஹாவில் ஹமாஸ் பேச்சுவார்த்தையாளர்களின் குடியிருப்பு வளாகங்களை குறிவைத்த தாக்குதல், “கோழைத்தனமான ஆக்கிரமிப்பு” என்றும் “இஸ்ரேலால் நடைமுறைப்படுத்தப்படும் அரசு பயங்கரவாதத்தை” பிரதிநிதித்துவப்படுத்துவதாகவும் அன்சாரி கூறினார்.
தோஹாவில் ஹமாஸ் தலைவர்கள் தங்கியிருந்த குடியிருப்பு வளாகத்தை செவ்வாயன்று இஸ்ரேல் குறிவைத்தது.
காசாவில் போரை முடிவுக்குக் கொண்டுவர அமெரிக்கா முன்மொழிந்த புதிய ஒப்பந்தம் குறித்து விவாதித்துக் கொண்டிருந்த ஐந்து ஹமாஸ் உறுப்பினர்களும் ஒரு கத்தார் பாதுகாப்பு அதிகாரியும் இந்தத் தாக்குதலில் கொல்லப்பட்டனர்.
காசாவில் போரை முடிவுக்குக் கொண்டுவருவதற்காக அமெரிக்காவால் முன்மொழியப்பட்ட புதிய ஒப்பந்தம் குறித்து அவர்கள் விவாதித்துக் கொண்டிருந்தனர்.
2023 அக்டோபர் முதல் இஸ்ரேல் 64,000க்கும் மேற்பட்ட மக்களைக் கொன்றுள்ளது. போரை முடிவுக்குக் கொண்டுவருவதற்கான பேச்சுவார்த்தைகளில் கத்தார், அமெரிக்கா மற்றும் எகிப்துடன் இணைந்து மத்தியஸ்தராக இருந்து வருகிறது.
