மலேசியாவில் நடைபெற்ற IFMA Muay Thai School World Championship 2026 சர்வதேச முஆய் தாய் சாம்பியன்ஷிப் போட்டியில் இலங்கை அணி சாதனை படைத்துள்ளது.
இப்போட்டித் தொடரில் இலங்கை வீராங்கனைகளும் வீரர்களும் 14 தங்கம், 7 வெள்ளி மற்றும் 25 வெண்கலப் பதக்கங்கள் உட்பட ஒட்டுமொத்தமாக 46 பதக்கங்களைக் குவித்து தாய்நாட்டிற்குப் பெருமை சேர்த்துள்ளனர்.
இலங்கை அணியின் இந்த மாபெரும் வெற்றியில், கஹட்டோவிட்ட பிரதேசத்தைச் சேர்ந்த இளம் பாடசாலை மாணவர்கள் தனித்துவமான முத்திரையைப் பதித்துள்ளனர்.
சர்வதேச அரங்கில் தடம் பதித்த மொஹம்மத் ஸாதாத் மற்றும் மொஹம்மத் நுவைர் ஆகிய மாணவர்கள் தங்களின் திறமைகளை வெளிப்படுத்தித் தங்கப் பதக்கங்களைச் சொந்தமாக்கிக் கொண்டனர்.
அதேபோன்று, மற்றொரு இளம் வீரரான மிசாரி சிறப்பாகப் போராடி வெண்கலப் பதக்கத்தைப் பெற்றுக்கொண்டார்.
சர்வதேச அரங்கில் அர்ப்பணிப்புடன் போட்டியிட்டு, இலங்கை நாட்டிற்கும் தங்களது ஊருக்கும் உலகளாவிய பெருமையைத் தேடித்தந்துள்ள இந்த இளம் சாதனையாளர்களுக்கும், அவர்களின் வெற்றிக்குப் பின்னால் இருந்து வழிநடத்திய பயிற்றுவிப்பாளர்கள் (Coaches), முஆய் தாய் கழகத்தினர் மற்றும் அனைத்து வழிகளிலும் ஒத்துழைப்பு வழங்கிய உறவினர்கள், நலன்புரி அமைப்புகள் அனைவருக்கும் பலரும் தங்களது மனமார்ந்த வாழ்த்துக்களையும் பாராட்டுக்களையும் தெரிவித்து வருகின்றனர்.
