பாகிஸ்தான், சவூதி அரேபியா மற்றும் துருக்கி இடையே வரலாற்றுச் சிறப்புமிக்க முத்தரப்பு பாதுகாப்பு ஒப்பந்தம் கையெழுத்து!

வளைகுடாப் பிராந்தியத்தில் போர்ச் சூழலும் பதற்றமும் அதிகரித்து வரும் நிலையில், பாகிஸ்தான், சவூதி அரேபியா மற்றும் துருக்கி ஆகிய மூன்று முக்கிய ஆசிய-முஸ்லிம் நாடுகள் இணைந்து வரலாற்றுச் சிறப்புமிக்க முத்தரப்பு கூட்டுப் பாதுகாப்பு ஒப்பந்தத்தில் (Trilateral Defense Agreement / Mecca Joint Defence Agreement) கையெழுத்திட்டுள்ளன.

மத்திய கிழக்கு பிராந்தியத்தில் நிலவும் போர்ச் சூழலுக்கு மத்தியில், பாகிஸ்தான் பிரதமர் ஷாபாஸ் ஷரீஃப், துணைப் பிரதமர் இஷாக் தார் மற்றும் ராணுவத் தலைமைத் தளபதி ஆசிம் முனீர் ஆகியோர் நேற்று சவூதி அரேபியாவிற்குத் திடீர் அரசு முறைப் பயணம் மேற்கொண்டனர்.

அங்கு சவூதி அரேபியாவின் பட்டத்து இளவரசரும் பிரதமருமான முகமது பின் சல்மானை சந்தித்த அவர்கள் முக்கிய ஆலோசனைகளில் ஈடுபட்டனர்.

இதனைத் தொடர்ந்து, துருக்கி ஜனாதிபதி ரெசப் தையிப் எர்டோகனும் சவூதி அரேபியாவுக்கு வருகை தந்தார். மெக்கா (Makkah) நகரில் உள்ள அல்-சஃபா அரண்மனையில் மூன்று நாட்டின் தலைவர்களும் பங்கேற்ற உயர்மட்ட முத்தரப்பு உச்சிமாநாடு நடைபெற்றது.

ஒப்பந்தத்தின் முக்கிய அம்சங்கள்:

இந்த உச்சிமாநாட்டின் இறுதியில் கையெழுத்தான கூட்டறிக்கையில் தெரிவிக்கப்பட்ட முக்கிய அம்சங்கள்:

• “மூன்று நாடுகளில் எந்தவொரு நாட்டின் மீது நடத்தப்படும் ஆயுதம் ஏந்திய தாக்குதலும், மூன்று நாடுகளின் மீதும் நடத்தப்பட்ட தாக்குதலாகவே கருதப்படும்” (‘Attack on one is an attack on all’) எனும் கூட்டுத் தற்காப்பு விதி இதில் சேர்க்கப்பட்டுள்ளது.

• ராணுவப் பயிற்சி, கூட்டுப் பயிற்சிகள், புலனாய்வுத் தகவல் பகிர்வு மற்றும் பாதுகாப்புத் துறைச் சார்ந்த தொழில்நுட்ப ஒத்துழைப்புகளை வலுப்படுத்துதல்.

• வளைகுடா மற்றும் செங்கடல் பகுதியில் அச்சுறுத்தல்களைக் கட்டுப்படுத்தி, பிராந்திய அமைதி மற்றும் பாதுகாப்பை உறுதி செய்தல்.

பின்னணி மற்றும் சர்வதேச முக்கியத்துவம்:

ஈரான் மற்றும் அமெரிக்கா-இஸ்ரேல் இடையிலான மோதல்கள், செங்கடல் பகுதியில் ஹூதி கிளர்ச்சியாளர்களின் தாக்குதல்கள் போன்ற அச்சுறுத்தல்களுக்கு மத்தியில் இந்த ஒப்பந்தம் முக்கியத்துவம் பெறுகிறது.

நேட்டோ (NATO) அமைப்பில் இரண்டாவது பெரிய ராணுவத்தைக் கொண்டுள்ள துருக்கி, அணுஆயுத வல்லமை கொண்ட ஒரே முஸ்லிம் நாடான பாகிஸ்தான் மற்றும் பொருளாதார ரீதியாக வலிமைமிக்க சவூதி அரேபியா ஆகிய மூன்று பிராந்திய வல்லரசுகள் ஒன்று சேர்ந்துள்ள இந்த நகர்வு, சர்வதேச அரசியலில் மிகப்பெரிய மாற்றத்தை ஏற்படுத்தும் என எதிர்பார்க்கப்படுகிறது.