போக்குவரத்து விதிமீறல்களுக்கான ‘குறைபாட்டுப் புள்ளி’ (Demerit Points) முறையை நடைமுறைப்படுத்தும் ஆறு மாத முன்னோடித் திட்டம் எதிர்வரும் ஒக்டோபர் மாதம் ஆரம்பிக்கப்படவுள்ளதாக போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க தெரிவித்துள்ளார்.
இன்று (28) காலை போக்குவரத்து அமைச்சில் நடைபெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கும்போதே அமைச்சர் இதனைக் குறிப்பிட்டார்.
குறித்த முன்னோடித் திட்டம் எதிர்வரும் ஒக்டோபர் மாதம் ஆரம்பிக்கப்பட்டு, அடுத்த ஆண்டு (2027) மார்ச் 31ஆம் திகதி வரை நடைமுறையில் இருக்கும் என அமைச்சர் தெரிவித்தார்.
வாகன சாரதிகளுக்கு இரண்டு வருட காலத்திற்கு குறிப்பிட்ட எண்ணிக்கையிலான புள்ளிகள் வழங்கப்படும்.
சாரதிகள் மேற்கொள்ளும் போக்குவரத்து விதிமீறல்களுக்கு ஏற்ப அந்தப் புள்ளிகளில் இருந்து புள்ளிகள் குறைக்கப்படும்.
போக்குவரத்து அபராதங்களைச் செலுத்துவதற்கான தற்போதைய இணையவழி கட்டண முறைகளை மேலும் விரிவுபடுத்தி, முழுமையான டிஜிட்டல் கட்டமைப்பின் ஊடாக இந்தத் திட்டத்தை வெற்றிகரமாக நடைமுறைப்படுத்த அமைச்சு திட்டமிட்டுள்ளதாக அமைச்சர் மேலும் குறிப்பிட்டார்.
