இலங்கையின் தந்தம் கொண்ட காட்டு யானையான ‘அக்போ’ (Agbo), இராணுவத்தினரின் உதவியுடன் இன்று (19) அநுராதபுரம் மாவட்டத்தின் நச்சதுவ இஹத்தாவ வனப்பகுதியில் கண்டறியப்பட்டுள்ளதாக பாதுகாப்பு அமைச்சு தெரிவித்துள்ளது.
சுற்றுச்சூழல் அமைச்சரின் கோரிக்கைக்கு அமைய, யானையைத் தேடும் நடவடிக்கைக்கு உதவுவதற்காக இலங்கை இராணுவத்தினரைக் கொண்ட விசேட குழுவொன்று ஈடுபடுத்தப்பட்டது.
பாதுகாப்புச் செயலாளர் ஓய்வுபெற்ற எயார் வைஸ் மார்ஷல் சம்பத் துயகொந்தவின் பணிப்புரைக்கு அமைய இந்த நடவடிக்கை முன்னெடுக்கப்பட்டது.
ஆரம்பகட்டமாக 30 இராணுவத்தினரைக் கொண்ட படைப்பிரிவு தேடுதல் நடவடிக்கையில் ஈடுபடுத்தப்பட்டதுடன், தேடுதலை விரைவுபடுத்தும் நோக்கில் பின்னர் இராணுவத்தினரின் எண்ணிக்கையும் அதிகரிக்கப்பட்டது.
இதன்போது, வனவிலங்கு அதிகாரிகளுடன் நெருக்கமாக இணைந்து செயற்பட்ட இராணுவத்தினர், தந்தம் கொண்ட காட்டு யானையான அக்போவைக் கண்டறியும் முயற்சிகளுக்கு ஒத்துழைப்பு வழங்கினர்.
