உலகம் முழுவதும் உற்சாகமாகத் கொண்டாடப்பட்ட ஈதுல் பித்ர் ஈகைத் திருநாள்: இடிபாடுகளுக்கு இடையே ஈத் தொழுகை நடத்திய பலஸ்தீனியர்கள்

புனித ரமழான் மாதத்தின் 30 நாட்கள் நோன்பிற்குப் பிறகு, ஷவ்வால் மாதத்தின் முதல் நாளான இன்று (வெள்ளிக்கிழமை), காசா, சவூதி அரேபியா உள்ளிட்ட வளைகுடா நாடுகள், ரஷ்யா, ஜப்பான் மற்றும் இந்தோனேசியா போன்ற நாடுகளில் ஈகைத் திருநாள் கோலாகலமாகக் கொண்டாடப்படுகிறது.

காசா (பலஸ்தீனம்): கடுமையான போர்ச் சூழல் மற்றும் இஸ்ரேலிய தாக்குதல்களுக்கு மத்தியிலும், காசா மக்கள் மிகுந்த மன உறுதியுடன் ஈத் தொழுகையை நடத்தினர்.

கான் யூனிஸ் பகுதியில் தரைமட்டமாக்கப்பட்ட அல்-ஹுதா மசூதியின் இடிபாடுகளுக்கு இடையே ஆயிரக்கணக்கானோர் திரண்டு உலக அமைதிக்காகப் பிரார்த்தனை செய்தனர். இரண்டு ஆண்டுகளுக்குப் பிறகு குண்டுவீச்சுகள் இல்லாத அமைதியான பெருநாள் விடியலை காசா குழந்தைகள் இன்று அனுபவித்தனர்.

சவூதி அரேபியா: மக்கா மற்றும் மதீனாவில் உள்ள புனிதப் பள்ளிகளில் லட்சக்கணக்கானோர் திரண்டு சிறப்புத் தொழுகையில் ஈடுபட்டனர். சவூதி மன்னர் மற்றும் இளவரசர் மக்களுக்குத் தங்கள் வாழ்த்துகளைத் தெரிவித்துள்ளனர்.

• ரஷ்யா: தலைநகர் மாஸ்கோவில் உள்ள மத்திய கதீட்ரல் மசூதியில் பல்லாயிரக்கணக்கான மக்கள் திரண்டனர். பள்ளிவாசல் வளாகம் தாண்டி வீதிகளிலும் மக்கள் அணிவகுத்து நின்று தொழுதனர். அதிபர் புதின் முஸ்லிம் சமூகத்தினருக்குத் தனது வாழ்த்துகளைத் தெரிவித்தார்.

• ஜப்பான்: டோக்கியோ மசூதியில் (Tokyo Camii) மக்கள் கூட்டம் அலைமோதியதால், இடநெருக்கடியைக் கருத்தில் கொண்டு அடுத்தடுத்து ஐந்து முறை பெருநாள் தொழுகை நடத்தப்பட்டது. ஜப்பானில் இஸ்லாமியர்களின் எண்ணிக்கை அதிகரித்து வருவதை இது காட்டுவதாக பள்ளிவாசல் நிர்வாகம் தெரிவித்தது.

• இந்தோனேசியா: உலகின் அதிக முஸ்லிம்களைக் கொண்ட நாடான இந்தோனேசியாவில், மக்கள் தாராவீஹ் தொழுகையை முடித்துவிட்டு, இன்று அதிகாலை மைதானங்களில் ஒன்றுகூடித் தொழுகை நடத்தினர்.

பலஸ்தீனத்தின் காசா பகுதியில் வசிக்கும் சிறுவர்கள், கடந்த இரண்டு ஆண்டுகளில் முதல்முறையாக இஸ்ரேலிய வான்வழித் தாக்குதல்கள் மற்றும் குண்டுவீச்சுகள் இல்லாத ஒரு அமைதியான ஈகைத் திருநாளை (Eid al-Fitr) இன்று கொண்டாடினர்.

கத்தார் முழுவதும் இன்று ஈகைத் திருநாள் மிகுந்த உற்சாகத்துடன் கொண்டாடப்பட்டது. தலைநகர் தோஹா மற்றும் பிற நகரங்களில் உள்ள பள்ளிவாசல்கள் மற்றும் ஈத்கா மைதானங்களில் லட்சக்கணக்கான முஸ்லிம்கள் திரண்டு சிறப்புத் தொழுகையை நிறைவேற்றினர்.

தெற்காசியாவில் நாளை கொண்டாட்டம்:

இந்தியா, பாகிஸ்தான், வங்கதேசம் மற்றும் இலங்கை ஆகிய நாடுகளில் நேற்று பிறை தென்படாததால், அங்கு ரமழான் 30 நாட்கள் நிறைவு செய்யப்பட்டு, நாளை (சனிக்கிழமை, மார்ச் 21) ஈகைத் திருநாள் கொண்டாடப்பட உள்ளது.