ஐபிஎல் 14ஆவது சீசனின் முதல் லீக் போட்டி, மும்பை இந்தியன்ஸ் மற்றும் ராயல் சேலஞ்சர்ஸ் பெங்களூர் அணிகளுக்கு இடையில் நடைபெற்றது. இப்போட்டியில் டாஸ் வென்ற ஆர்சிபி முதலில் பந்துவீச முடிவு செய்தது.
மும்பை அணியில் துவக்க வீரர்களாக ரோஹித் ஷர்மா, கிறிஸ் லின் ஆகியோர் களமிறங்கினர். ரோஹித் 19 ரன்கள் சேர்த்து ஆட்டமிழந்தார். மறுமுனையில் சிறப்பாக விளையாடிய லின் 35 பந்துகளில் 49 ரன்கள் குவித்து அதிரடி காட்டினார். தொடர்ந்து சூர்யகுமார் யாதவ் 31 (23), இஷான் கிஷன் 28 (19) ஆகியோரும் ஓரளவுக்கு சிறப்பாக விளையாடினர்.
இதனால், மும்பை இந்தியன்ஸ் அணியின் ஸ்கோர் கணிசமாக உயரத் துவங்கியது. இந்நிலையில், ஆர்சிபி பந்துவீச்சாளர் ஹர்சல் படேல் சிறப்பாக பந்துவீசி மும்பை அணிக்கு நெருக்கடி கொடுக்க ஆரம்பித்தார்.
இவரின் பந்துவீச்சை எதிர்கொள்ள ஹார்திக் பாண்டியா, கெய்ரன் பொல்லார்ட், க்ருனால் போன்றவர்கள் திணறி, அடுத்தடுத்து ஆட்டமிழந்தனர். இதனால், மும்பை அணி 20 ஓவர்கள் முடிவில் 159/9 ரன்கள் மட்டுமே சேர்த்தது.
ஹர்சல் படேல் 4 ஓவர்கள் வீசி, 27 ரன்களை மட்டும் விட்டுக்கொடுத்து 5 விக்கெட்களை கைப்பற்றி அசத்தினார். வாஷிங்டன் சுந்தர் ஒரு ஓவர் மட்டும் வீசி 7 ரன்களை விட்டுக்கொடுத்து ஒரு விக்கெட்டை வீழ்த்தினார்.
இலக்கைத் துரத்திய ஆர்சிபி அணியில் கேப்டன் விராட் கோலி, வாஷிங்டன் சுந்தர் இருவரும் ஓபன்களாக களமிறங்கினர். சுந்தர் 10 ரன்கள் மட்டும் சேர்த்து பெவிலியன் திரும்பினார். அடுத்து களமிறங்கிய இளம் வீரர் ராஜட் படிதரும் (8) வந்த வேகத்தில் நடையைக் கட்டினார். இதனால், ஆர்சிபிக்கு நெருக்கடி ஏற்பட்டது.
அடுத்துக் களமிறங்கி கிளென் மேக்ஸ்வெல் அதிரடியாக விளையாடி 28 பந்துகளில் 39 ரன்கள் விளாசி அசத்தினார். ஓபனர் விராட் கோலியும் தனது பங்கிற்கு 29 பந்துகளில் 33 ரன்கள் அடித்து அவுட் ஆனார்.
தொடர்ந்து ஷாபஸ் அகமது, டேனியல் கிறிஸ்டியன், கைல் ஜேமிசன் ஆகியோரும் வந்த வேகத்தில் நடையைக் கட்டினர். இதனால், ஆர்சிபி தோல்வியை நோக்கி பயணித்தது. 18 பந்துகளில் 34 ரன்கள் தேவை என்னும் நேரத்தில் ஏபி டிவிலியர்ஸ் அதிரடியாக விளையாடத் துவங்கினார். இதனால், 6 பந்துகளில் 7 ரன்கள் அடிக்க வேண்டும் என்ற நலை ஏற்பட்டது. அப்போது டிவிலியர்ஸ் 48 (27) அவுட் ஆனதால் ஆட்டத்தில் பரபரப்பு தொற்றிக்கொண்டது. இறுதியில் ஒரு பந்திற்கு ஒரு ரன் தேவை என்னும் நிலையில் ஹர்சல் படேல் வெற்றிக்கு தேவையான ரன்னை அடித்து, அணிக்கு 2 விக்கெட்கள் வித்தியாசத்தில் த்ரில் வெற்றியைப் பெற்றுக்கொடுத்தார்.
