சுமார் 1200 வருடங்கள் பழைமை வாய்ந்த பலாங்கொடை – தப்தர் ஜெய்லானி பள்ளிவாசல், பள்ளிவாசல் நுழைவாயில், வளாகம், ஸியாரம் என்பன கடந்த வெசக் பண்டிகையின் போது பௌத்த கொடிகளாலும் வெசக் கூடுகளாலும் பலவந்தமாக அலங்கரிக்கப்பட்டுள்ளது. அந்த அலங்காரங்களும், வெசக் கூடுகளும் தொடர்ந்தும் காட்சிப்படுத்தப்பட்டுள்ளன.
பள்ளிவாசலில் காட்சிப்படுத்தப்பட்டிருந்த பச்சை நிற கொடிகள் கழற்றி அப்புறப்படுத்தப்பட்டுள்ளன. பள்ளிவாசலில் பணியாளர்கள் இல்லாத சந்தர்ப்பத்திலேயே இச்சம்பவம் இடம்பெற்றுள்ளது. நெல்லிகல வட்டகும்புற தம்மா ரதன தேரரின் வழிகாட்டல்களின் படியே பள்ளிவாசலில் வெசக் அலங்காரங்கள் மேற்கொள்ளப்பட்டதாக தெரிவிக்கப்படுகிறது.
இவ்விவகாரம் தொடர்பில் தற்போதைய பள்ளிவாசல் நிர்வாகம் ஏதும் நடவடிக்கைகள் மேற்கொள்ளப்படவில்லை எனவும், பள்ளிவாசல் தலைவர் உட்பட நிர்வாகிகள் பலர் கொழும்பை வசிப்பிடமாகக் கொண்டுள்ளதால் பள்ளிவாசல் நிர்வாகம் ஸ்தம்பித நிலையை அடைந்துள்ளதாகவும் அப்பகுதி மக்கள் ஊடகத்துக்கு தெரிவித்தனர்.
இது தொடர்பில் பள்ளிவாசல் நிர்வாக சபையின் தற்போதைய தலைவர் எம்.எஸ்.எம்.நபீஸிடம் ‘விடிவெள்ளி’ வினவிய போது, ‘தனக்கு எதுவும் தெரியாது’ எனத் தெரிவித்தார்.
பள்ளிவாசலின் நிர்வாக சபை முன்னாள் தலைவி ரொசானா அபுசாலியை விடிவெள்ளி தொடர்பு கொண்டு வினவிய போது பள்ளிவாசல் அலங்காரங்களுக்கு உட்படுத்தப்பட்டிருப்பதை உறுதி செய்ததுடன் இது தொடர்பில் தற்போதைய நிர்வாகமே இதற்குப் பொறுப்புக் கூற வேண்டும் என்றார்.
தற்போதைய நிர்வாக சபை வக்பு சபையினால் நியமிக்கப்பட்டமை குறிப்பிடத்தக்கதாகும். அதன் பதவிக்காலம் அடுத்த மாதம் நிறைவு பெறுகிறது.
(ஏ.ஆர்.ஏ.பரீல்)<
