சர்வதேச சமூகம் எதிர்பார்க்கும் அரசியல் மற்றும் பொருளாதார சீர்திருத்தங்களை நிறைவேற்றும் வரை இலங்கைக்கு ஒரு பைசா கூட வெளிநாட்டு கடன் உதவி கிடைக்காது என எதிர்க்கட்சியின் பிரதம கொறடா லக்ஷ்மன் கிரியெல்ல தெரிவித்தார்.
இன்று (31) கொழும்பு எதிர்க்கட்சித் தலைவரின் அலுவலகத்தில் நடைபெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கையிலேயே அவர் இவ்வாறு குறிப்பிட்டுள்ளார்.
நாட்டை கட்டியெழுப்புவதற்கு தேவையான பொருளாதார மற்றும் அரசியல் சீர்திருத்தங்களில் கவனம் செலுத்தாமல் சர்வதேச கடன் உதவி பற்றி கனவு காண்பதில் பயனில்லை என அவர் தெரிவித்தார்.
‘இன்று எமது நாடு எதிர்நோக்கும் இந்த பொருளாதாரப் பேரழிவை எதிர்கட்சியில் இருந்த நாங்கள் ஒன்றரை வருடங்களுக்கு முன்னர் பார்த்தோம்.
எதிர்க்கட்சித் தலைவர், முன்னணி அரசியல் கட்சிகள், பொருளாதார நிபுணர்கள் என அவ்வப்போது குரல் எழுப்பி வருகின்றனர்.
ஆனால் டொலர் கையிருப்பு பூஜ்ஜியமாக குறையும் வரை அரசாங்கம் காத்திருந்தது. அப்போதைய நிதியமைச்சர் பட்ஜெட் தாக்கல் செய்த பிறகு இந்த பொருளாதார நெருக்கடி குறித்து வாய் திறக்கவே இல்லை.
இப்போது நாட்டில் டொலரும் இல்லை, ரூபாயும் இல்லை. எனினும், நாட்டுக்குள் டொலர்கள் எப்படிப் புழங்கும் என்று அரசாங்கம் இன்னும் கனவு காண்கிறது.
உலக வங்கியிடமிருந்து 700 மில்லியன் அமெரிக்க டொலர்களை பெறுவதாக அரசாங்கம் கூறியது. 24 மணி நேரத்திற்குள், உலக வங்கி அதை நிராகரித்தது. இலங்கைக்கு உதவி வழங்குவது தொடர்பில் இதுவரை எந்த கலந்துரையாடலும் ஆரம்பிக்கப்படவில்லை என அவர்கள் தெரிவித்துள்ளனர்.
இந்த நெருக்கடி தொடங்கி நீண்ட நாட்களாகிவிட்டது. ஒவ்வொரு நாளும் நாம் செய்தித்தாள்களைப் பார்க்கும்போது நம் நாட்டின் தலைவர்கள் பல்வேறு நாடுகளிடம் உதவி கேட்கிறார்கள்.
எவ்வாறாயினும், சில்லறை உதவிகளைத் தவிர, நாட்டை மீண்டும் கட்டியெழுப்ப எந்த உதவியும் இன்றுவரை காணப்படவில்லை.
உலக வங்கி, சர்வதேச நாணய நிதியம் உள்ளிட்ட நிறுவனங்களின் அறிக்கைகளில் இருந்து இலங்கைக்கு இரண்டு விடயங்கள் உதவியாக இருக்கும் என எதிர்பார்க்கப்படுகின்றது.
அவர்கள் நமது நாட்டில் பொருளாதார சீர்திருத்தங்கள் மற்றும் அரசியல் சீர்திருத்தங்களில் கவனம் செலுத்தியுள்ளனர்.
இந்த இரண்டு விஷயங்களையும் வெற்றிகரமாக முடிக்காமல், எவ்வளவு கடன் கேட்டாலும், இந்த சீர்திருத்தங்களை சர்வதேசத்திடம் ஒப்படைக்கும் வரை, எங்களுக்கு கடன் கிடைக்காது. எனவும் அமைச்சர் தெரிவித்துள்ளார்.
