பாலஸ்தீனத்தின் காஸா பகுதியை கடந்த 20 ஆண்டுகளாக நிர்வகித்து வந்த தன்னாட்சி அமைப்பைக் கலைப்பதாக ஹமாஸ் அமைப்பு திங்கட்கிழமை அதிகாரப்பூர்வமாக அறிவித்துள்ளது.
போரினால் கடுமையாகப் பாதிக்கப்பட்டுள்ள காஸா பகுதியில் சிவில் ஆட்சியை நடைமுறைப்படுத்துவதற்காக, ‘நிபுணர்கள் குழு’ (Technocratic committee) ஒன்றிற்கு வழிவிடும் நோக்கில் இந்த வரலாற்று முக்கியத்துவம் வாய்ந்த அரசியல் மாற்றம் மேற்கொள்ளப்பட்டுள்ளது.
கடந்த 2006-ம் ஆண்டு நடைபெற்ற சட்டமன்றத் தேர்தலில் ஹமாஸ் வெற்றி பெற்றதைத் தொடர்ந்து, 2007-ம் ஆண்டு போட்டி அமைப்பான ஃபத்தாவின் (Fatah) வசம் இருந்து காஸாவின் கட்டுப்பாட்டை ஹமாஸ் தனது கைகளில் எடுத்தது. அன்று முதல் தற்போது வரை காஸாவை ஹமாஸ் அமைப்பே நிர்வகித்து வந்தது.
கடந்த ஆண்டு அக்டோபர் மாதம் அமெரிக்காவின் மத்தியஸ்தத்தில் இஸ்ரேலுடன் ஏற்பட்ட போர்நிறுத்த ஒப்பந்தத்திற்குப் பிறகு, காஸாவின் அன்றாட சிவில் நிர்வாகத்தில் இருந்து தாங்கள் விலகத் தயாராக இருப்பதாக ஹமாஸ் தொடர்ந்து கூறி வந்தது. எனினும், ஹமாஸ் அமைப்பின் ஆயுதங்களைக் களைவது தொடர்பான விவகாரத்தில் இன்னும் இறுதி முடிவு எட்டப்படவில்லை.
இதுகுறித்து காஸா அரசு ஊடக அலுவலகம் வெளியிட்டுள்ள அறிக்கையில், ஹமாஸ் அவசரக் குழுவின் தலைவர் முகமது அல்-ஃபர்ரா தனது பதவியை அதிகாரப்பூர்வமாக ராஜினாமா செய்துள்ளதாகவும், நிர்வாக மாற்றத்தை எளிதாக்கும் வகையில் இந்த அவசரக் குழு கலைக்கப்படுவதாகவும் தெரிவிக்கப்பட்டுள்ளது.
அமெரிக்காவின் ஆதரவுடன் உருவாக்கப்பட்டுள்ள ‘காஸா நிர்வாகத்திற்கான தேசியக் குழு’ (NCAG), காஸாவின் எதிர்கால நிர்வாகப் பொறுப்புகளை விரைவில் ஏற்கும் என்று ஹமாஸ் தெரிவித்துள்ளது.
“இஸ்ரேலின் ஆக்கிரமிப்பு மற்றும் இனப்படுகொலை போருக்கு முற்றுப்புள்ளி வைக்கும் நோக்கில், காஸா நிர்வாகப் பொறுப்பில் இருந்து ஹமாஸ் விலகும் இந்த புதிய படியை எடுத்துள்ளது. தேசியக் குழுவிடம் (NCAG) அரசாங்கப் பொறுப்புகளை ஒப்படைக்க ஹமாஸ் முழு உடன்பாட்டுடன் தயாராக உள்ளது” என்று ஹமாஸ் செய்தித் தொடர்பாளர் ஹசிம் காசிம் தெரிவித்துள்ளார்.
இந்த அறிவிப்பு குறித்து காஸாவிலிருந்து அல் ஜசீரா ஊடகவியலாளர் ஹானி மஹ்மூத் கூறுகையில், “இந்த நடவடிக்கை ஹமாஸ் அமைப்பு காஸாவில் தனது அரசியல் அல்லது ராணுவப் பங்களிப்பை முற்றிலுமாக கைவிடுவதைக் குறிக்காது. மாறாக, நேரடி சிவில் அரசாங்க நிர்வாகத்தில் இருந்து மட்டுமே அவர்கள் பின்வாங்கியுள்ளனர்” என்று குறிப்பிட்டுள்ளார்.
ஹமாஸின் இந்த முடிவை NCAG குழுவின் தலைவர் அலி ஷாத் வரவேற்றுள்ளார். தேவையான ஆதாரங்களும் வசதிகளும் கிடைத்தவுடன் காஸாவின் தேசியப் பொறுப்புகளை ஏற்கத் தயாராக இருப்பதாக அவர் சமூக ஊடகத்தில் பதிவிட்டுள்ளார்.
இஸ்ரேல் தரப்பில் ஹமாஸ் மீண்டும் காஸாவை ஆளக் கூடாது என்பதில் உறுதியாக இருக்கும் அதே வேளையில், மேற்கு கரையை நிர்வகிக்கும் பாலஸ்தீன அதிகார அமைப்பு (Palestinian Authority) நேரடியாக காஸாவைத் தன் கட்டுப்பாட்டில் எடுப்பதையும் தற்போதைய சூழலில் இஸ்ரேல் நிராகரித்துள்ளது குறிப்பிடத்தக்கது.
