அசர்பைஜானின் பாகு நகரில் 2026 ஒக்டோபர் 14 மற்றும் 15 ஆகிய திகதிகளில் நடைபெறவுள்ள 7 ஆவது ‘ஆசியாவில் தொடர்பு மற்றும் நம்பிக்கையை வளர்ப்பதற்கான நடவடிக்கைகள் தொடர்பான மாநாட்டில் இலங்கைத் தூதுக்குழுவிற்கு வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித்த ஹேரத் தலைமை தாங்கவுள்ளார்.
இந்த மாநாட்டின் போது, இலங்கைக்கான நாட்டின் நிலைப்பாட்டை அமைச்சர் விஜித்த ஹேரத் முன்வைப்பார் என்று வெளியுறவு, வெளிநாட்டு வேலைவாய்ப்பு மற்றும் சுற்றுலாத்துறை அமைச்சு வெளியிட்டுள்ள அறிக்கையில் தெரிவித்துள்ளது.
இந்தப் பயணத்தின்போது, கஜகஸ்தான், உஸ்பெகிஸ்தான் மற்றும் தஜிகிஸ்தான் உள்ளிட்ட உறுப்பு நாடுகளைச் சேர்ந்த தங்கள் இணையான அமைச்சர்கள், மாநட்டினை நடத்தும் அசர்பைஜானின் தலைவர்கள் மற்றும் மாநாட்டின் பொதுச் செயலாளர் ஆகியோருடன் அமைச்சர் விஜித்த ஹேரத் இருதரப்புப் பேச்சுவார்த்தைகளை நடத்துவார்.
அசர்பைஜானில் நடைபெறவுள்ள 7 ஆவது ஆசியாவில் தொடர்பு மற்றும் நம்பிக்கையை வளர்ப்பதற்கான நடவடிக்கைகள் தொடர்பான மாநாட்டில், தெற்காசியா, தென்கிழக்கு ஆசியா, மத்திய ஆசியா மற்றும் மத்திய கிழக்கு ஆகிய பகுதிகளைச் சேர்ந்த அதன் 28 உறுப்பு நாடுகளின் அரசு மற்றும் நாட்டுத் தலைவர்கள் மற்றும் வெளியுறவு அமைச்சர்கள் பங்கேற்பார்கள் என்று அந்த அமைச்சகம் தெரிவித்துள்ளது.
இந்தப் பயணம் பரந்த ஆசியக் கண்டத்துடனான உறவை வலுப்படுத்தவும், மத்திய ஆசியாவின் விரைவான வளர்ச்சி கொண்ட பொருளாதாரங்களுடன் புதிய பொருளாதாரக் கூட்டணிகளை உருவாக்கவும் ஒரு சிறந்த வாய்ப்பை வழங்குகிறது.
அமைதி, பாதுகாப்பு மற்றும் ஸ்திரத்தன்மையை மேம்படுத்துவதற்கான ஒத்துழைப்பை வலுப்படுத்துவதில், ஆசியாவிலேயே மிகப்பெரிய பிராந்திய அரசுகளுக்கிடையிலான மன்றமாக இந்த மாநாடு திகழ்கிறது என்றும் அந்த அறிக்கை மேலும் தெரிவித்தது.
