சவூதி அரேபியாவில் மரண தண்டனை விதிக்கப்பட்டிருந்த அனோஜன் சிவராசா என்ற இலங்கைப் பிரஜையின் மரண தண்டனையை அந்நாட்டின் உயர் நீதிமன்றம் ரத்து செய்து உத்தரவிட்டுள்ளதாக இலங்கையின் பிரதி வெளிவிவகார அமைச்சர் அருண் ஹேமச்சந்திர தெரிவித்துள்ளார்.
இது தொடர்பில் சமூக வலைத்தளத்தில் அறிக்கை ஒன்றை வெளியிட்டுள்ள பிரதி அமைச்சர், சவூதி உயர் நீதிமன்றம் 2026 அக்டோபர் 13 ஆம் திகதியன்று இந்த மரண தண்டனை தீர்ப்பை ரத்து செய்துள்ளதாகக் குறிப்பிட்டுள்ளார்.
இலங்கை அரசாங்கம் முன்னெடுத்த தொடர்ச்சியான இராஜதந்திர மற்றும் சட்ட முயற்சிகளின் பலனாகவே இந்த வெற்றி கிடைத்துள்ளதாகவும், இது அனோஜன் சிவராசாவிற்கு கிடைத்த பெரும் நிம்மதி என்றும் அவர் வர்ணித்துள்ளார்.
இந்த விடயத்தில் வழங்கப்பட்ட ஒத்துழைப்பிற்காக சவூதி அரேபிய அரசாங்கத்திற்கு தனது நன்றியைத் தெரிவித்துக் கொண்ட பிரதி அமைச்சர், இலங்கைத் தூதுவர், வெளிவிவகார அமைச்சின் செயலாளர் மற்றும் அதிகாரிகள், இலங்கை வெளிநாட்டு வேலைவாய்ப்புப் பணியகத்தின் தலைவர் மற்றும் உறுப்பினர்கள், அத்துடன் இந்த வழக்கில் பணியாற்றிய இலங்கை மற்றும் சவூதி சட்டக் குழுவினருக்கும் தனது பாராட்டுகளையும் நன்றிகளையும் தெரிவித்துள்ளார்.
அனோஜன் சிவராசாவின் சட்டப் போராட்டத்தில் இதுவொரு மிக முக்கிய திருப்பமாக அமைந்த போதிலும், அவரது தற்போதைய சட்ட நிலைமை மற்றும் அடுத்தகட்ட நடவடிக்கைகள் தொடர்பான மேலதிக விபரங்கள் எதுவும் இதுவரை வெளியிடப்படவில்லை.
