இலங்கையின் மிகவும் உயரமான யானை என அறியப்பட்ட காவன்திஸ்ஸ உயிரிழந்துள்ளது. அண்மைக்காலமாக நோய்வாய்ப்பட்டிருந்த குறித்த யானைக்கு சிகிச்சைகள் வழங்கப்பட்டு வந்த நிலையில் அது உயிரிழந்துள்ளதாக தெரியவந்துள்ளது.
இன்று காலை சியம்பலன்கமுவ பகுதியில் யானை உயிரிழந்த நிலையில் அடையாளம் காணப்பட்டுள்ளது. கல்கமுவ பகுதியில் வசித்து வந்த இந்த யானையின் உடல் நிலை தொடர்பில் கடந்த காலங்களில் பல்வேறு சிக்கல்கள் எழுந்தன.
அதன் முன்பக்க வலது பாதத்தில் காணப்பட்ட துப்பாக்கிச் சூட்டுக் காயத்திற்கு கடந்த மாதம் 24ம் திகதி முதல் சிகிச்சையளிக்கப்பட்டு வந்தது.
பாதத்தின் காயம் குறிப்பிட்டளவில் குணமடைந்திருந்த போதிலும் கடந்த சில நாட்களாக யானை உணவருந்துவதில் சிரமங்கள் உள்ளிட்ட வேறு நோய் அறிகுறிகளுக்கு உள்ளானதாக கால்நடை வைத்திய குழு தெரிவித்துள்ளது.
இந்நிலையிலேயே காவன்திஸ்ஸ யானை இன்று காலை உயிரிழந்த நிலையில் மீட்கப்பட்டுள்ளதாக அவர்கள் தெரிவித்துள்ளனர்.
