இலங்கை வான்படைக்காக இஸ்ரேலிடமிருந்து 4 இராணுவ ட்ரோன்கள்: ரூ. 4.26 பில்லியன் ஒதுக்கீட்டிற்கு நாடாளுமன்றம் ஒப்புதல்!

இலங்கை வான்படையின் (SLAF) கண்காணிப்பு மற்றும் பாதுகாப்பு நடவடிக்கைகளுக்காக இஸ்ரேலிடமிருந்து 4 தன்னாட்சி வான்வழி ஊர்திகளை (UAV / Military Drones) கொள்முதல் செய்வதற்காக ரூ. 4.26 பில்லியன் (சுமார் 4,261 மில்லியன் ரூபாய்) கூடுதல் நிதியை ஒதுக்குவதற்கு இலங்கை நாடாளுமன்றம் ஒப்புதல் அளித்துள்ளது.

அரசாங்கங்களுக்கு இடையிலான (Government-to-Government) ஒப்பந்த அடிப்படையில், ‘இஸ்ரேல் ஏரோஸ்பேஸ் இண்டஸ்ட்ரீஸ்’ (IAI) பங்கு வைத்துள்ள ‘புளூபேர்ட் ஏரோ சிஸ்டம்ஸ்’ (BlueBird Aero Systems) நிறுவனத்திடமிருந்து இந்த ட்ரோன்கள் பெறப்படவுள்ளன.

நாடாளுமன்றத்தில் நடைபெற்ற விவாதத்தைத் தொடர்ந்து ‘2026 ஆம் ஆண்டிற்கான 08 ஆம் இலக்க மேலதிக மதிப்பீடு’ (Supplementary Estimate No. 08 of 2026) மூலம் ரூ. 4,261 மில்லியன் நிதி அங்கீகரிக்கப்பட்டது.

இலங்கையின் பிரத்தியேக பொருளாதார மண்டலத்தை (EEZ) கண்காணித்தல், சந்தேகத்திற்கிடமான படகுகளைக் கண்டறிதல், காணாமல் போன மீனவர்களைத் தேடுதல் மற்றும் இயற்கை பேரிடர்களின் போது நிவாரணப் பணிகளுக்கு உதவுதல் ஆகிய நோக்கங்களுக்காக இவை பயன்படுத்தப்படும் என பாதுகாப்பு பிரதிமைச்சர் அருண ஜயசேகர தெரிவித்துள்ளார்.

இதில் 14 மணி நேரம் வரை தொடர்ச்சியாகப் பறக்கக்கூடிய ‘தண்டர்பீ’ (ThunderB) ரக ட்ரோன்களும், 20 மணி நேரம் வரை பறக்கும் திறன் கொண்ட பிற ட்ரோன்களும் அடங்கும்.

இந்த ஒப்பந்தத்தில் ட்ரோன்களை இயக்குபவர்களுக்கான சிறப்புப் பயிற்சி மற்றும் 3 ஆண்டுகளுக்கான பராமரிப்புச் சேவைகளும் உள்ளடங்கும்.

வான்படை ஹெலிகொப்டர்களின் பராமரிப்பிற்காக ஏற்கனவே ஒதுக்கப்பட்ட நிதியைத் திருப்பிவிடுவதன் மூலம் இதற்கான செலவு ஈடுசெய்யப்படும் என்றும், புதிய கூடுதல் அரசாங்க நிதி தேவையில்லை என்றும் பிரதிமைச்சர் குறிப்பிட்டார்.

இஸ்ரேலுடனான இராணுவ உறவுகள்,கவலைகள்:

ஆயுதமேந்திய மோதல் காலத்தில் பயன்படுத்தப்பட்ட இஸ்ரேலிய தயாரிப்பான ‘கபிர்’ (Kfir) போர் விமானங்களை நவீனமயமாக்கும் திட்டம் அண்மையில் நிறைவடைந்ததைத் தொடர்ந்து, இப்புதிய ட்ரோன் கொள்முதல் ஒப்பந்தம் மேற்கொள்ளப்பட்டு வருகிறது.

அதேவேளை, வடக்கு-கிழக்கு பிராந்தியங்களில் இலங்கை இராணுவத்தினால் முன்னெடுக்கப்படும் ட்ரோன் கண்காணிப்புகள் குறித்து தமிழ் மக்கள் தொடர்ந்து கவலைகளையும் எதிர்ப்புகளையும் தெரிவித்து வருகின்றனர்.

சட்டமா அதிபர் திணைக்களத்தின் சட்ட ஆலோசனைகளுக்குப் பிறகு அமைச்சரவையின் ஒப்புதலுடன் எதிர்வரும் டிசம்பர் மாதத்திற்குள் இதற்கான அதிகாரப்பூர்வ ஒப்பந்தம் கையெழுத்தாகும் என எதிர்பார்க்கப்படுகிறது.