எரிபொருள் விலை உயர்த்தப்பட்ட போதிலும் பஸ், பாடசாலை வான் கட்டணங்களில் மாற்றமில்லை 

எரிபொருள் விலைகள் உயர்த்தப்பட்ட போதிலும், பஸ் கட்டணங்கள் மற்றும் பாடசாலை மாணவர்களுக்கான போக்குவரத்து வாகன கட்டணங்களில் எந்தவித மாற்றமும் இருக்காது என அறிவிக்கப்பட்டுள்ளது.

அதேவேளை, முச்சக்கர வண்டி கட்டணங்களை உயர்த்துவது தொடர்பில் அந்தந்த சங்கங்களுக்கு இடையே மாறுபட்ட கருத்துக்கள் நிலவி வருகின்றன.

இலங்கை தனியார் பஸ் உரிமையாளர்கள் சங்கத்தின் தலைவர் கெமுனு விஜேரத்ன இது குறித்து தெரிவிக்கையில், பஸ் கட்டண திருத்த சூத்திரத்தின்படி, எரிபொருள் விலை உயர்வு 4 சதவீத வரம்பை எட்டாததால் தற்போதைக்கு பஸ் கட்டணங்களை உயர்த்த முடியாது எனக் குறிப்பிட்டார். அ

ண்மைக்கால திருத்தங்கள் மூலம் டீசல் விலை லிட்டருக்கு 15 ரூபாய் வரை உயர்த்தப்பட்டிருந்தாலும், தற்போதைய சூத்திரத்தின் கீழ் கட்டண உயர்வை நியாயப்படுத்த அது போதுமானதாக இல்லை என அவர் சுட்டிக்காட்டினார்.

இருப்பினும், பஸ் தொழில் தொடர்ந்து நஷ்டத்திலேயே இயங்கி வருவதாகவும், குறுகிய தூர சேவைகள் மூலம் நாளொன்றுக்கு சுமார் 1,000 ரூபாயும், நீண்ட தூர சேவைகள் மூலம் சுமார் 2,000 ரூபாயும் நஷ்டம் ஏற்படுவதாகவும் அவர் மேலும் தெரிவித்தார்.

இதேவேளை, எரிபொருள் விலை அதிகரித்துள்ள போதிலும் பாடசாலை போக்குவரத்து கட்டணங்கள் உயர்த்தப்பட மாட்டாது என பாடசாலை வான் போக்குவரத்து சங்கங்களும் தெரிவித்துள்ளன.

ஆனால், முச்சக்கர வண்டி கட்டணத்தை உயர்த்துவது குறித்து முச்சக்கர வண்டி சங்கங்கள் மத்தியில் பிளவு ஏற்பட்டுள்ளது.

தேசிய ஐக்கிய முச்சக்கர வண்டி ஓட்டுநர்கள் மற்றும் தொழிலதிபர்கள் சங்கத்தின் பொதுச்செயலாளர் எல். ரோஹண பெரேரா தெரிவிக்கையில், உயர்ந்து வரும் எரிபொருள் செலவுக்கு ஏற்ப முச்சக்கர வண்டி கட்டணங்கள் திருத்தப்பட வேண்டும் என்றார்.

அதன்படி, முதல் கிலோமீட்டருக்கான கட்டணத்தை 110 ரூபாயில் இருந்து 120 ரூபாயாகவும், அடுத்தடுத்த ஒவ்வொரு கிலோமீட்டருக்குமான கட்டணத்தை 90 ரூபாயில் இருந்து 100 ரூபாயாகவும் உயர்த்த அவர் முன்மொழிந்துள்ளார்.

இது தொடர்பான முன்மொழிவை தேசிய போக்குவரத்து ஆணைக்குழுவிடம் சமர்ப்பித்து வரும் நாட்களில் பதிலுக்காக காத்திருக்கவுள்ளதாகவும், நடவடிக்கை எடுக்கப்படாவிட்டால் கட்டண மீட்டர் திருத்த சேவை நிறுவனங்களுடன் ஆலோசித்து முடிவு எடுக்கப்படும் என்றும் அவர் எச்சரித்துள்ளார்.

எனினும், ஏனைய முச்சக்கர வண்டி சங்கங்கள் உடனடி கட்டண உயர்வுக்கு எதிர்ப்பு தெரிவித்துள்ளதோடு, தற்போதைக்கு கட்டணங்களை உயர்த்த வேண்டிய அவசியமில்லை என வலியுறுத்தியுள்ளன.