மலேசியாவின் பகாங் (Pahang) மாநிலத்தில் குர்ஆனியக் கல்வியை மேம்படுத்தும் நோக்கில், ‘புனித குர்ஆன் பல்கலைக்கழகம்’ என்ற பிரத்யேகக் கல்வி நிறுவனம் நிறுவப்படவுள்ளது. இதற்கு மாநில சுல்தான் அப்துல்லா ரியாத்துதீன் அல்-முஸ்தபா பில்லா அவர்கள் தனது ஒப்புதலை வழங்கியுள்ளார்.
தற்போது இயங்கி வரும் சுல்தான் அஹ்மத் ஷா இஸ்லாமிய பல்கலைக்கழகத்தின் (UnIPSAS) பெயரை, ‘புனித குர்ஆன் பல்கலைக்கழகம்’ என மாற்றுவதற்கு மாநில அரசு எடுத்த முடிவைச் சுல்தான் அங்கீகரித்துள்ளார். இதன் மூலம், குர்ஆனிய அறிவியலில் (Quranic Sciences) நிபுணத்துவம் பெற்ற அறிஞர்கள், போதகர்கள் மற்றும் சிறந்த தலைவர்களை உருவாக்கும் நாட்டின் முதல் சிறப்புப் பல்கலைக்கழகமாக இது உருவெடுக்கிறது.
இது குறித்துச் சுல்தான் கூறுகையில், “இந்த முன்னெடுப்பு பகாங் மாநிலத்தின் ஆன்மீகச் சிந்தனை மற்றும் குர்ஆனிய ஆய்வுகளை வலுப்படுத்துவதற்கான ஒரு தெளிவான மைல்கல்லாகும். குர்ஆன் குறித்த பொதுவான புரிதலை விரிவுபடுத்தவும், தகுதிவாய்ந்த பணியாளர்களை உருவாக்கவும் இப்பல்கலைக்கழகம் பெரும் பங்காற்றும்,” எனத் தெரிவித்தார்.
தனது அதிகாரப்பூர்வ பேஸ்புக் பக்கத்தில் இது ஒரு “வரலாற்றுச் சிறப்புமிக்க அடையாளம்” என்றும் அவர் குறிப்பிட்டுள்ளார்.
ஜூபிலி பிராக் மண்டபத்தில் நடைபெற்ற 69-வது ஆண்டு குர்ஆன் ஓதுதல் மற்றும் மனப்பாடப் போட்டியின் நிறைவு விழாவில் இந்த அறிவிப்பு வெளியானது.
மேலும், புனித ரமழான் மாதத்திற்கு மக்கள் தயாராக வேண்டும் என அழைப்பு விடுத்த அவர், சகிப்புத்தன்மை மற்றும் தேவையுள்ளோருக்கு உதவுவதன் மூலமே ரமழானின் ஆசீர்வாதம் முழுமையடையும் என்று வலியுறுத்தினார்.
