2026-ஆம் ஆண்டுக்கான ஹஜ் கடமையை நிறைவேற்றுவதற்காக இலங்கையிலிருந்து புறப்பட்ட 325 யாத்ரீகர்கள் அடங்கிய முதல் குழுவினர், சனிக்கிழமை சவூதி அரேபியாவின் ஜெத்தா நகரை சென்றடைந்தனர்.
இதன் மூலம் இந்த ஆண்டுக்கான இலங்கையின் ஹஜ் நடவடிக்கைகள் உத்தியோகபூர்வமாக ஆரம்பமாகியுள்ளதாக ரியாத்திலுள்ள இலங்கைத் தூதரகம் தெரிவித்துள்ளது.
யாத்ரீகர்களை வரவேற்பதற்கும், அவர்களின் வருகைக்கான ஏற்பாடுகளைச் செய்வதற்கும், பதில் தூதரகத் தலைவர் மஃபுசா லஃபிர், அஸ்மியா அமீர் அஜ்வத், ஜெத்தாவில் உள்ள இலங்கைத் துணைத் தூதரகத்தின் அதிகாரிகள், 2026 ஆம் ஆண்டுக்கான இலங்கையின் நியமிக்கப்பட்ட ஹஜ் சேவை வழங்குநரான ரெஹ்லத் வ மனாஃபேயின் பிரதிநிதிகள் மற்றும் நுசுக் ஹஜ் நடவடிக்கைகளின் பிரதிநிதிகளும் உடனிருந்தனர்.
வருகை தந்த யாத்ரீகர்களிடையே உரையாற்றிய தூதுவர் அமீர் அஜ்வத், ஹஜ் பயணத்தின் ஆன்மீக முக்கியத்துவத்தை எடுத்துரைத்ததுடன் அவர்களுக்குத் தனது வாழ்த்துகளையும் தெரிவித்தார்.
மேலும், புனித இரு ஹரம்களின் பாதுகாவலர் மன்னர் சல்மான் பின் அப்துல் அஸீஸ் அல் சவுத் மற்றும் மகுட இளவரசரும் பிரதமருமான முகமது பின் சல்மான் ஆகியோருக்குத் தனது நன்றிகளைத் தெரிவித்தார்.
இலங்கை உட்பட உலகம் முழுவதிலுமிருந்து வருகை தரும் மில்லியன் கணக்கான யாத்ரீகர்களின் வசதிக்காக சவூதி அரசாங்கம் மேற்கொண்டுள்ள நேர்த்தியான ஏற்பாடுகளை அவர் பாராட்டியதுடன், இலங்கை யாத்ரீகர்களின் பாதுகாப்பு மற்றும் தேவைகளை உறுதி செய்ய ரியாத் மற்றும் ஜெத்தா தூதரகங்கள் எப்போதும் தயாராக உள்ளதாகவும் உறுதியளித்தார்.
இவ்வருடம் இலங்கையிலிருந்து மொத்தம் 3,500 பேர் ஹஜ் கடமையை நிறைவேற்ற அனுமதிக்கப்பட்டுள்ளனர்.
இந்த நடவடிக்கைகளை வெற்றிகரமாக முன்னெடுக்க இலங்கை ஹஜ் தூதுக்குழு, சவூதி ஹஜ் மற்றும் உம்ரா அமைச்சு மற்றும் உள்ளூர் பயண முகவர்கள் இணைந்து செயற்பட்டு வருவதாகத் தெரிவிக்கப்பட்டுள்ளது.
