நுவரெலியா மாவட்டத்தில் நிலவும் சீரற்ற வானிலையால் 1,091 குடும்பங்கள் பாதிக்கப்பட்டுள்ளதாகவும், மேலும் 5 பேர் உயிரிழந்துள்ளதாகவும், ஒருவரைக் காணவில்லை என்றும் நுவரெலியா மாவட்டச் செயலாளர் துஷாரி தென்னக்கோன் தெரிவித்தார்.
நுவரெலியா மாவட்டத்தில் நிலவி வந்த மோசமான வானிலை தற்போது ஓரளவு தணிந்துள்ளதாக நுவரெலியா மாவட்டச் செயலாளர் துஷாரி தென்னக்கோன் கூறினார்.
நுவரெலியா மாவட்டத்தில் நிலவும் பேரிடர் நிலவரம் குறித்து, இன்று (04) நுவரெலியா மாவட்டச் செயலகத்தில் நடைபெற்ற ஊடக சந்திப்பில் மாவட்டச் செயலாளர் இந்த அறிக்கையை வெளியிட்டார்.
மேலும் கருத்து தெரிவித்த மாவட்டச் செயலாளர், 1,091 குடும்பங்களைச் சேர்ந்த 3,951 பேர் பாதிக்கப்பட்டுள்ளதாகவும், நுவரெலியா மாவட்டத்தில் உள்ள 20 இடம்பெயர்ந்தோர் முகாம்களில் 523 குடும்பங்களைச் சேர்ந்த 2,195 பேரும், உறவினர் வீடுகளில் 224 பேரும் உள்ளனர் என்றும் கூறினார்.
நுவரெலியா மாவட்டத்தில் ஏற்பட்ட பேரிடர்களில் 2 வீடுகள் முழுமையாகவும், 90 வீடுகள் பகுதியாகவும் சேதமடைந்துள்ளதாகவும், வீடுகளுக்குள் கசிந்த நீர் வடிந்த பிறகு மக்களை அவர்களது வீடுகளுக்குத் திரும்ப அனுப்ப நடவடிக்கை எடுக்கப்படும் என்றும் மாவட்ட செயலாளர் மேலும் தெரிவித்தார்
