இலங்கையின் பொருளாதார மண்டலத்திற்குள் சிக்கியுள்ள ஈரானியக் கப்பல்களில் உள்ள இந்தியா, வங்காளதேசம், ஈரான் உள்ளிட்ட நாடுகளைச் சேர்ந்த மாலுமிகள் மற்றும் தொழிலாளர்கள் உணவு, குடிநீர் மற்றும் மருந்துப் பற்றாக்குறையால் தவித்து வருகின்றனர்.
அமெரிக்கத் தடைகள் மற்றும் முற்றுகைகள் காரணமாகச் சொந்த நாடுகளுக்குத் திரும்ப முடியாமல் தவிக்கும் இவர்களுக்கு அவசரமான அதிகாரப்பூர்வ மனிதநேய உதவிகளை வழங்குமாறு ஜனாதிபதி அநுர குமார திசாநாயக்க அவர்களுக்குத் தேசிய ஷூரா சபை (NSC) கோரிக்கை விடுத்துள்ளது.
(09.10.2026) ஜனாதிபதி அநுர குமார திசாநாயக்க அவர்களுக்கு அனுப்பப்பட்ட அவசரக் கடிதத்தில், இலங்கையில் உள்ள 14 தேசிய அளவிலான முஸ்லிம் அமைப்புகளை உள்ளடக்கிய தேசிய ஷூரா சபை (NSC), “பிராந்தியக் கடற்பரப்பு என்பது இறையாண்மையைச் செயற்படுத்துவதற்கான ஒரு எல்லையே தவிர, மனிதநேய உதவியைக் கட்டுப்படுத்தும் எல்லை அல்ல” என்ற மனிதநேயக் கொள்கையைக் கடைப்பிடிக்குமாறு ஜனாதிபதியை வலியுறுத்தியுள்ளது.
இலங்கையின் பிரத்தியேக பொருளாதார மண்டலத்திற்குள் (EEZ) காலிக்குத் தெற்கே சிக்கியுள்ள ஈரானியக் கப்பல்கள், நம்பகமான தகவல்களின்படி, கடுமையான குடிநீர், உணவு மற்றும் மருந்துப் பற்றாக்குறையை எதிர்கொண்டுள்ளதாகவும், அவற்றுக்கு உத்தியோகபூர்வ அரசாங்க தேடல் மற்றும் மீட்புப் பணிகளும் சாத்தியமான மருத்துவ உதவியும் தேவைப்படுவதாகவும் NSC ஜனாதிபதிக்குத் தெரிவித்துள்ளது.
இக்கப்பல்களில் ஈரான், இந்தியா, வங்காளதேசம் மற்றும் பல அயல் நாடுகளைச் சேர்ந்த சிவிலியன் மாலுமிகளும் தொழிலாளியும் பயணிக்கின்றனர்.
ஐக்கிய நாடுகள் சபையின் அல்லது ஐ.நா. பாதுகாப்புப் பேரவையின் ஒப்புதல் அல்லது அதிகாரம் எதையும் கொண்டிராத, அமெரிக்க ஜனாதிபதி டொனால்ட் டிரம்பால் அறிவிக்கப்பட்ட ஒருபக்கத் தடைகள் மற்றும் தொடர் கடற்படை முற்றுகை காரணமாக இந்த ஈரானியச் சிவிலியன் கப்பல்களால் தங்கள் சொந்த நாடுகளுக்குத் திரும்ப முடியவில்லை.
09.10.2026 தேதியிட்ட NSC கடிதத்தில், NSC தலைவரும் ஜனாதிபதி சட்டத்தரணியுமான எம்.எம். ஸுஹைர் மற்றும் பொதுச் செயலாளரும் சட்டத்தரணியுமான ரஷீத் எம். இம்தியாஸ் ஆகியோர் கையெழுத்திட்டுள்ளனர். மேலும் இக்கடிதத்தின் நகல்கள் வெளிநாட்டலுவல்கள் அமைச்சர், இலங்கையின் மனித உரிமைகள் ஆணையகம், பாதுகாப்புச் செயலாளர் மற்றும் இலங்கை கடற்படைத் தளபதி ஆகியோருக்கு அனுப்பி வைக்கப்பட்டுள்ளன.
ஜனாதிபதிக்கு விடுக்கப்பட்ட வேண்டுகோள்:
“இந்தக் கப்பல்கள் 12 கடல் மைல் பிராந்தியக் கடற்பரப்புக்கு அப்பால் இருக்கும் வரை எந்தவொரு பொருட்களும் வழங்கப்படாது என்ற நிலையைக் குறித்து நாங்கள் கடுமையான மனிதநேயக் கவலை அடைகிறோம்.
அடிப்படைப் பொருட்களை உத்தியோகபூர்வமாக விநியோகிக்க இலங்கை கப்பல் முகவர்கள், கப்பல் வழங்குநர்கள் (ship chandlers) அல்லது தனியார் நிறுவனங்களை ஊக்குவிக்கவோ அல்லது வசதிகளிகவோ அரசாங்கம் எந்த முயற்சியும் எடுக்கவில்லை.
எனவே மிகுந்த மரியாதையுடன், சர்வதேச சட்டத்தின் கீழ் இலங்கையின் கடமைகளுக்கோ அல்லது நமது நாட்டின் மனிதநேய மரபுகளுக்கோ இந்த நிலைப்பாடு முரணானது என்பதை நாங்கள் தெரிவித்துக் கொள்கிறோம்” எனவே, மாலுமிகள் மற்றும் தொழிலாளர்களுக்கு உடனடி உத்தியோகபூர்வ உதவியை வழங்கும்படி NSC கோரியுள்ளது.
சர்வதேச சட்டங்கள் மற்றும் மரபுகளின் கீழான இலங்கையின் கடமைகள்
- ஐக்கிய நாடுகள் சபையின் உறுப்பு நாடாக: உணவு மற்றும் மருந்து போன்ற அடிப்படை மனிதத் தேவைகளுக்குத் தடையாக இருக்கும் ஒருபக்கக் கட்டாய நடவடிக்கைகளுக்கு ஐ.நா. பொதுச் சபையும் மனித உரிவைக் கவுன்சிலும் பலமுறை கவலை தெரிவித்துள்ளன. ஐ.நா. தடைக் காலங்களிலும் மனிதநேய உதவிகளைப் பாதுகாப்புப் பேரவை தீர்மானம் 2664 (2022) பாதுகாக்கிறது. அமெரிக்கத் தடைகளின் நடைமுறைகள் கூட உணவு மற்றும் மருந்துகளைத் தடையிலிருந்து விலக்குகின்றன.
- கடல் சட்டத்தின் கீழ்: UNCLOS இன் 98 ஆம் சரத்து மற்றும் SOLAS ஐந்தாம் அத்தியாயம் ஆகியவை, நபர்களின் தேசிய நிலை அல்லது சூழலைப் பொருட்படுத்தாமல், ஆபத்தில் உள்ள நபர்களுக்குத் தேடல் மற்றும் மீட்புச் சேவைகளை வழங்கக் கோருகின்றன.
- சர்வதேச மனித உரிமைகள் சட்டம்: இலங்கையானது உயிருப்புரிமையைப் பாதுகாக்க (சரத்து 6) நியாயமான நடவடிக்கைகளை எடுக்க வேண்டும். கடலில் மேற்கொள்ளும் மீட்புப் பணிகள் மற்றும் நாட்டின் எல்லைக்கு வெளியே உள்ள, ஆனால் நாட்டின் நடவடிக்கைகளால் பாதிக்கப்படும் நபர்களுக்கும் இது பொருந்தும்.
- சர்வதேச மனிதநேயச் சட்டம் மற்றும் நடுநிலைமை: நடுநிலைமை என்பது போரிடும் நாட்டிற்கு ராணுவ/வணிக ஆதரவளிப்பதைத் தடைசெய்கிறதே தவிர, பொதுமக்களுக்கு உணவளிப்பதைத் தடைசெய்வதில்லை. ‘கார்பூ கால்வாய்’ (1949) மற்றும் ‘நிகரகுவா’ (1986) வழக்குகளின்படி மனிதநேய உதவி சட்டவிரோதமான தலையீடு அல்ல. ஜெனீவா மாநாடு II வணிகக் கடற்படையினரைப் பாதுகாக்கிறது மற்றும் நடுநிலையான உதவிகளை ஊக்குவிக்கிறது.
- இலங்கையின் சொந்த நடைமுறை: 2026 மார்ச்சில் ‘ஐரிஸ் தேனா’ (IRIS Dena) உயிர்வாதியோரைக் காப்பாற்றிய இலங்கையும், ‘ஐரிஸ் பூஷெர்’ (IRIS Booshehr) கப்பலைப் பாதுகாப்பாக அழைத்து வந்ததும் மனிதநேயப் பொறுப்பாக வர்ணிக்கப்பட்டது. இந்தச் சாதகமான முன்னுதாரணமும் அரசியலமைப்பின் 27(15) வது பிரிவும் இன்றும் பொருந்துவனவாகும்.
NSC இன் தாழ்மையான வேண்டுகோள்கள்:
(அ) பிராந்தியக் கடற்பரப்பு என்பது இறையாண்மையைச் செயற்படுத்துவதற்கான எல்லைதானே தவிர, மனிதநேய உதவியைக் கட்டுப்படுத்துவதற்கான எல்லை அல்ல என்ற கொள்கையைக் கடைப்பிடிக்க வேண்டும்.
(ஆ) ‘பிராந்தியக் கடற்பரப்பு’ என்ற நிபந்தனையை நீக்கிவிட்டு, கொடி அல்லது தேசிய இன வேறுபாடின்றி உண்மையான மனிதநேயத் தேவைகளைப் பூர்த்தி செய்யும் என்று அறிவிக்க வேண்டும்.
(இ) கொழும்பு MRCC, இலங்கை கடற்படை மற்றும் கடலோரப் பாதுகாப்புப் படை ஆகியவை செஞ்சிலுவைச் சங்கம் (ICRC) உடன் இணைந்து குடிநீர், உணவு, மருந்துகளை வழங்கவும், நோயாளிகளை மீட்டு சிகிச்சை அளிக்கவும் உத்தரவிட வேண்டும்.
(ஈ) வெறும் மனிதநேயப் பொருட்களை வழங்குவது சட்டப்பூர்வமானது என்பதை இலங்கை கப்பல் முகவர்கள் மற்றும் தனியார் நிறுவனங்களுக்குத் தெளிவுபடுத்த வேண்டும்.
(உ) ஈரான், இந்தியா, வங்காளதேசம் மற்றும் கொடி ஏந்திய நாடுகளின் அரசாங்களுடன் இணைந்து மாலுமி நலம் மற்றும் தாயகம் திரும்புதலை உறுதிப்படுத்த வேண்டும்.
(ஊ) எதிர்காலத்தில் கடலில் நடக்கும் மனிதநேய நிவாரணப் பணிகள் ஒருபோதும் ஒருபக்க நடவடிக்கைகளுக்குப் பிணைக்கைதியாக மாற்றப்படாமல் இருக்கத் தூதரக வழிமுறைகள் மூலம் நிலையான கொள்கையை ஏற்க வேண்டும்.
