அரசாங்கத்தால் முன்மொழியப்பட்டுள்ள பயங்கரவாதத்திலிருந்து அரசைப் பாதுகாக்கும் சட்டம்’ (PSTA) மசோதாவிற்கு எதிராக செவ்வாய்க்கிழமை (13) கொழும்பில் கண்டன ஆர்ப்பாட்டம் ஒன்று முன்னெடுக்கப்பட்டது.
ஜனாதிபதி செயலகத்திற்கு வெளியே திரண்ட ஆர்ப்பாட்டக்காரர்கள், கொடூரமான பயங்கரவாதத் தடைச் சட்டத்தை (PTA) முழுமையாக ரத்து செய்ய வேண்டும் என்றும், புதிதாக கொண்டுவரப்பட்டுள்ள நாட்டை பயங்கரவாதத்திலிருந்து பாதுகாக்கும் சட்ட மசோதாவை (PSTA) உடனடியாகத் திரும்பப் பெற வேண்டும் என்றும் கோரிக்கை விடுத்தனர்.
பாராளுமன்றத்தில் சமர்ப்பிக்கப்பட்ட புதிய மசோதா:
1979 ஆம் ஆண்டின் 48 ஆம் இலக்க தற்காலிக ஏற்பாடுகள் சட்டமான பயங்கரவாதத் தடைச் சட்டத்தை நீக்கிவிட்டு, அதற்குப் பதிலாக புதிய சட்டக் கட்டமைப்பை அறிமுகப்படுத்தும் நோக்கில் நாட்டை பயங்கரவாதத்திலிருந்து பாதுகாக்கும் மசோதாவை நீதி அமைச்சர் ஹர்ஷன நானயக்கார கடந்த அக்டோபர் 06 ஆம் திகதி பாராளுமன்றத்தில் சமர்ப்பித்திருந்தார்.
இந்த உத்தேச பயங்கரவாதத் தடைச் சட்டம், பயங்கரவாதக் குற்றங்கள் மற்றும் அது தொடர்பான குற்றங்களை அடையாளம் காணுதல், கைது செய்தல், தடுத்து வைத்தல், விசாரணை செய்தல், வழக்குத் தொடர்தல் மற்றும் தண்டித்தல் போன்ற புதிய சட்ட ஏற்பாடுகளை உள்ளடக்கியுள்ளது.
மேலும், உள்நாட்டிலோ அல்லது வெளிநாட்டிலோ இழைக்கப்படும் பயங்கரவாதச் செயல்களில் இருந்து இலங்கையின் தேசிய பாதுகாப்பு மற்றும் பொதுமக்களைப் பாதுகாப்பதையும், இலங்கையின் நிலப்பரப்பு வெளிநாடுகளில் பயங்கரவாத நடவடிக்கைகளுக்குப் பயன்படுத்தப்படுவதைத் தடுப்பதையும் இந்த மசோதா நோக்கமாகக் கொண்டுள்ளது.
