பங்களாதேஷின் சர்வதேச இஸ்லாமியப் பல்கலைக்கழகத்தின் (IIUC) பொருளாளர் பேராசிரியர் கலாநிதி மஹ்பூபுர் ரஹ்மான் மற்றும் சர்வதேச விவகாரங்கள் மற்றும் மாணவர்கள் நலன்புரி பிரிவின் பதில் பணிப்பாளர் முஹம்மத் மஹ்ஃபூஸுர் ரஹ்மான் ஆகியோர் அடங்கிய இருவர் கொண்ட உயர்மட்டப் பிரதிநிதிகள் குழு, கடந்த ஆகஸ்ட் 5 அன்று கொழும்பிலுள்ள இலங்கை ஜமாஅதே இஸ்லாமி (SLJI) தலைமையகத்திற்கு விஜயம் ஒன்றை மேற்கொண்டது.
இச்சந்திப்பின் போது, IIUC பல்கலைக்கழகத்தின் கல்வித் திட்டங்கள் மற்றும் வங்கதேசத்தில் உயர் கல்வியைத் தொடர விரும்பும் இலங்கை மாணவர்களுக்கான வாய்ப்புகள் குறித்து ஜமாஅதே இஸ்லாமி தலைவர்களுக்குப் பிரதிநிதிகள் தெளிவுபடுத்தினர்.
12,000-க்கும் மேற்பட்ட மாணவர்களைக் கொண்டு இயங்கும் IIUC பல்கலைக்கழகம்; சமூக அறிவியல், தகவல் தொழில்நுட்பம் (IT), பொறியியல் (Engineering) உட்பட பல துறைகளில் இளங்கலை மற்றும் முதுகலை பட்டப்படிப்புகளை வழங்கி வருகிறது.
இலங்கை ஜமாஅதே இஸ்லாமி சார்பில் அதன் உப தலைவர் பொறியியலாளர் பதுர்தீன் ஹஸாம் மற்றும் மூத்த உறுப்பினர்கள் இச்சந்திப்பில் கலந்துகொண்டனர்.
இலங்கை மாணவர்கள் IIUC பல்கலைக்கழகத்தில் தரமான உயர் கல்வியைப் பெறுவதற்கும், இரு நிறுவனங்களுக்கும் இடையிலான கல்விக் கூட்டுறவை வலுப்படுத்துவதற்கும் இக்கலந்துரையாடல் ஒரு சிறந்த வாய்ப்பாக அமைந்தது.
