வடக்கு நேபாளத்தின் ரகுவா மாவட்டத்தில் ஆகஸ்ட் 26 அன்று ஏற்பட்ட கடுமையான திடீர் வெள்ளப்பெருக்கைத் தொடர்ந்து, நேபாள அரசாங்கத்திற்கு 1 மில்லியன் அமெரிக்க டொலர் மதிப்பிலான மனிதாபிமான நிதியுதவியை வழங்குவதற்கான முன்மொழிவுக்கு அமைச்சரவை ஒப்புதல் அளித்துள்ளது.
வெள்ளப்பெருக்கு குறிப்பிடத்தக்க உயிர் இழப்புகளையும், சொத்து மற்றும் உள்கட்டமைப்புகளுக்குப் பெரும் சேதத்தையும் ஏற்படுத்தியுள்ளது.
இது நேபாள அரசாங்கத்தின் மீதும் அந்நாட்டு மக்கள் மீதும் கடுமையான மனிதாபிமானச் சுமையைச் சுமத்தியுள்ளது.
காணாமல் போனவர்களைத் தேடும் பணிகள் தொடர்ந்து நடைபெற்று வரும் சூழலிலும், மேலும் வெள்ளம் ஏற்படும் அபாயம் நீடிக்கும் நிலையிலும், அத்தியாவசியக் கட்டமைப்புகள் பெருமளவில் சேதமடைந்துள்ளதாலும், அவசர நிவாரணம் மற்றும் சீரமைப்பு உதவிகள் தேவைப்படுவதாக அரசு தெரிவித்துள்ளது.
இலங்கைக்கும் நேபாளத்திற்கும் இடையே வலுவான கலாச்சார, மத மற்றும் மக்கள் இடையிலான பிணைப்புகளை அடிப்படையாகக் கொண்ட நீண்டகால நட்புறவைக் கருத்தில் கொண்டு, ஜனாதிபதி சமர்ப்பித்த முன்மொழிவு ஒன்றுக்கு அமைச்சரவை அங்கீகாரம் வழங்கியது.
அரசுத் தகவல் திணைக்களம் வெளியிட்ட அறிக்கையின்படி, பெரும் இயற்கை அனர்த்தங்களால் ஏற்பட்ட கடுமையான மனிதாபிமான மற்றும் பொருளாதார விளைவுகள் குறித்த இலங்கையின் சொந்த அனுபவமும் இந்த மனிதாபிமான உதவியை அங்கீகரிப்பதில் கருத்தில் கொள்ளப்பட்டது.
